58 երկիրներ ՄԱԿ-ին կոչ կ՛ուղղեն Սուրիոյ հարցը փոխանցելու միջազգային քրէական դատարանին
«Էսոշիէյթըտ Փրես» կը հաղորդէ, որ 58 երկիրներ ՄԱԿ-ին կոչ ուղղած են սատարելու բանաձեւի
այն նախագիծին, որուն միջոցով կը նախատեսուի Սուրիոյ գործը ներկայացնել Միջազգային քրէական
դատարանին եւ նպաստել ատոր որդեգրման ՄԱԿ-ի Ապահովութեան խորհուրդին մէջ: Ըստ նշեալ
բանաձեւին, միջազգային դատարանը պէտք է հետաքննութեան ենթարկէ մեղադրանքները այն լուրջ
յանցագործութիւններուն շուրջ, զորս կատարած են Սուրիոյ կառավարական զօրքերը, կառավարամէտ
խմբաւորումները, ինչպէս նաեւ` զինեալ ընդդիմադիրները: Բանաձեւի հեղինակներուն նպատակն
է յստակ ազդանշան ուղարկել, որ ամէնէն լուրջ յանցագործութիւնները, միջազգային իրաւունքին
համաձայն, չեն կրնար անպատիժ մնալ: Ըստ այդ փաստաթուղթին, Սուրիոյ իշխանութիւնները
պատասխանատու են զանգուածային սպանդի 8, իսկ ընդդիմադիրները` մէկ դէպքի համար: Ռուսիոյ
արտաքին գործոց փոխնախարար Կենատի Կաթիլով յայտարարեց, որ «Մոսկուա սուրիական թղթածրարին
Միջազգային քրէական դատարանին փոխանցելուն դէմ պիտի օգտագործէ վեթոյի իր իրաւունքը»: