Atë Picabala: pritet me padurim vizita e Papës në Tokën Shenjte
Në Tokën Shenjte, vazhdojnë përgatitjet për shtegtimin e Papës Françesku, i cili do
të shkojë në ato troje nga data 24 deri më 26 maj, me rastin e 50-vjetorit të takimit
ekumenik ndërmjet Papës Pali VI dhe Patriarkut Atenagora. Për mënyrën si po përjetohen
ditët para vizitës së Atit të Shenjtë, të dëgjojmë Rojtarin e Tokës Shenjte, atë Pierbatista
Picabala: Udhëtimi i
Papës Françesku karakterizohet veçanërisht nga inkurajimi i madh për gjithë bashkësinë
e krishterë, jo vetëm për atë katolike, këtu në Tokën Shenjte. Do të jetë një udhëtim,
që inkurajon dhe mbështet praninë e krishterë, sjell ngushëllim, sidomos me takimin
ndërmjet Papës Françesku dhe Patriarkut Bartolomeu në Varrin e Krishtit, që do të
jetë një shenjë e madhe dhe një gjest bashkimi ndërmjet të gjithë të krishterëve të
botës, por sidomos ndërmjet atyre të Tokës Shenjte. Si e shohin hebrenjtë
dhe myslimanët këtë vizitë papnore? Ka pasur episode, që ndoshta, e kanë shqetësuar
këtë pritje të gëzueshme. Por, duhet të them, se si nga ana izraelite, ashtu edhe
nga ana myslimane, ka kuriozitet të madh dhe qëndrim shumë pozitiv ndaj Papës Françesku,
të cilin e duan fort të gjithë. Ç’ka mbetur nga vizitat e mëparshme të Shën
Gjon Palit II dhe të Benediktit XVI? Shën Gjon Pali II ka lënë një kujtim të
pashlyeshëm. Pas shumë vjetësh, ishte Papa i parë që hyri zyrtarisht në Izrael dhe
bëri gjeste shumë të rëndësishme, si në Yad Vashem, si në Murin e Lotëve, ashtu edhe
me vizitën në xhami. Ndryshoi paragjykimet e opinionit publik për Kishën Katolike.
Edhe Benedikti XVI ka lënë një kujtim të thellë në bashkësinë e krishterë, me kremtimet
dhe me fjalën e tij shumë të fuqishme e shumë të qartë. Ky shtegtim papnor
mund të zhbllokojë bisedimet e filluara që në vitin 1993 për nënshkrimin e Marrëveshjes
bazë ndërmjet Selisë së Shenjtë dhe Izraelit? Marrëveshja bazë është diskutuar
tashmë që prej shumë vjetësh e kemi rënë dakord, në përgjithësi, për të gjitha temat.
Tani duhet ta përfundojmë punën e kjo do të kërkojë edhe pak kohë. Qëllimisht, nuk
deshëm ta lidhim vizitën e Papës me nënshkrimin e marrëveshjes, pikërisht për ta lënë
Papën të lirë nga çështjet diplomatike e për t’i dhënë vizitës një frymëmarrje më
të gjerë. Sa herë që një Papë shkon në Viset e Krishtit, flitet për Çenakullin.
Ndokush përvijon mundësinë e kthimit të Sallës së Çenakullit në duart e Rojtarisë
së Tokës Shenjte. Ç’mendoni ju? Ne do ta prisnim me gëzim të madh. Në të vërtetë,
kjo çështje ka ndezur shumë diskutime si në botën islamike, ashtu edhe në atë hebraike.
Në realitet, nuk është fjala për kthimin e [Çenakullit], por për përdorimin e tij
liturgjik, jo më shumë. Edhe kështu, ka mjaft polemika, të cilat janë të parashikueshme,
prandaj urojmë që pas vizitës së Papës, të qetësohen disi e të kalojnë në nivelin
normal. Debati vazhdon akoma. Është një vend tepër i rëndësishëm, për të cilin konkurojnë
të tria fetë monoteiste, por është edhe rasti që këto fe të diskutojnë për çështje
konkrete ndërmjet tyre e jo për parime abstrakte.