ԵԱՀԿ առաքելութիւնը սահմանի վրայ ծրագրային դիտարկում իրականացուցած է
Լեռնային Ղարաբաղի Հանրապետութեան իշխանութիւններու հետ նախապէս կայացուցած համաձայնութեամբ`
ԵԱՀԿ առաքելութիւնը Մայիս 19-ին լեռնային Ղարաբաղի եւ Ատրպէյճանի զինուած ուժերու սահմանի
ծրագրային դիտարկում իրականացուցած է Մարտակերտ-Թարթառ ճանապարհահատուածին` ԵԱՀԿ Մինսկի
խումբի համանախագահներու մասնակցութեամբ: Դիտարկումը իրականացած է ԵԱՀԿ գործող նախագահի
անձնական ներկայացուցիչ դեսպան Անճէյ Գասպշիկի գլխաւորութեամբ: Այս մասին կը յայտնեն
ԼՂՀ ԱԳՆ մամուլի ծառայութենէն: ԼՂՀ պաշտպանութեան բանակի դիրքերէն դիտարկումը իրականացուցած
են ԵԱՀԿ գործող նախագահի անձնական ներկայացուցիչի դաշտային օգնականներ Եւկենի Շարովը
(Ուքրանիա) եւ Խրիսթօ Խրիսթովը (Պուլկարիա): Սահմանի հակառակ կողմէն դիտարկումը իրականացուցած
են ԵԱՀԿ գործող նախագահի անձնական ներկայացուցիչի դաշտային օգնական Իրժի Ապերլեն (Չեխիա)
եւ ԵԱՀԿ ԳՆԱՆ գրասենեակի աշխատակից Փետեր Սուետպըրկը: Դիտարկման ժամանակ ԵԱՀԿ Մինսկի
խումբի համանախագահները եւ ԵԱՀԿ գործող նախագահի անձնական ներկայացուցիչը անցած են ատրպէյճանական
տարածք` ԼՂՀ կողմէն: Դիտարկման առաքելութեան ղարաբաղեան կողմէն ուղեկցած են ԼՂՀ արտաքին
գործոց նախարարութեան եւ պաշտպանութեան նախարարութեան ներկայացուցիչները: