«Արաբական Լիկան եւ ՄԱԿ-ը Սուրիական թղթածրարին մէջ կատարելապէս ձախողեցաւ» ըսաւ Նեպիլ
Արապի։
Արաբական լիկայի ընդհանուր քարտուղար Նեպիլ Արապի յայտնեց, որ Արաբական լիկան սուրիական
թղթածրարին մէջ կատարելապէս ձախողեցաւ, ինչպէս նաեւ ձախողեցան ՄԱԿ-ը, սուրիական կառավարութիւնն
ու ընդդիմութիւնը: «Ո՛չ ոք յաջողեցաւ, ո՛չ արաբական պետութիւններէն մէկը, ո՛չ ալ ՄԱԿ-ի
մնայուն անդամներէն մէկը, մասնաւորաբար նաեւ Ամերիկան եւ Ռուսիան», նշեց Արապի յայտնելով
թէ. «Իւրաքանչիւր օր, որ կը սպաննուի սուրիացի քաղաքացի մը, ըլլայ ան ընդդիմութենէն կամ
կառավարամէտ, մեր ձախողութիւնը կը հաստատուի»: ՍԱՆԱ լրատու գործակալութիւնը կը հաղորդէ,
որ ՄԱԿ-ի ընդհանուր քարտուղար Պան Քի Մուն դատապարտած է Հալէպի մէջ ջուրի մատակարարման
դադրեցումը: Ան կոչ ուղղած է վերականգնելու ջուրի մատակարարումը հաստատելով որ մարդիկ
ջուրէ զրկելը մարդու հիմնական իրաւունքներու խախտում է: ՄԱԿ-ի մէջ Միացեալ Նահանգներու
մնայուն ներկայացուցիչ Սամանթա Փաուըր եւս դատապարտած է երեւոյթը` նշելով, որ այդ ձեւով
վտանգուած է 2.5 միլիոն մարդ: Հալէպ արդէն 8 օր է ջուրի մատակարարումէ զրկուած է: «Ինթըրֆաքս»
լրատու գործակալութիւնը կը հաղորդէ, որ Սուրիոյ արտաքին գործոց փոխնախարար Ֆայսալ Մըքտատ
յայտարարած է, որ Միացեալ Նահանգները, Ֆրանսան եւ Բրիտանիան Սուրիոյ տարածքին մէջ գործող
ահաբեկիչներուն կ՛աջակցին: Դիւանագէտը յայտնած է, որ այդ երկիրները դէմ են Սուրիոյ
մէջ բարեփոխումներուն, որոնց նպատակն է ժողովրդավարութեան յառաջխաղացումը եւ Սուրիոյ
մէջ մարդու իրաւունքներու ու օրէնքի գերակայութեան զարգացումը: