Եւրոպական խորհուրդի պաշտօնատարը կը դատապարտէ ազրպէյճանի մէջ Ֆրանսացի լրագրողներու
ձերբակալութիւնը
Ազրպէյճանական kontakt.az կայքը կը հաղորդէ, որ Եւրոպական Խորհուրդի մարդու իրաւունքներու
հարցերով յանձնակատար Նիլս Մուժնիեքս դատապարտած է Պաքուի մէջ ֆրանսացի լրագրողներ Լորան
Ռիշարի եւ Էմանուել Պախի ձերբակալութիւնն ու սարքերու բռնագրաւումը: Մուժնիեքս «Թուիթըր»-ի
ընկերային ցանցին վրայ գրած է. «Մտահոգուած եմ Ազրպէյճանի մէջ ֆրանսացի լրագրողներու
ձերբակալութեամբ եւ նիւթերու բռնագրաւումով: Ատիկա հերթական հարուածն է այդ երկրին մէջ
մամուլի ազատութեան եւ մարդու իրաւունքներուն»: Ֆրանսացի լրագրողները ձերբակալուած
էին Պաքուի օդակայանին մէջ` Փարիզ ուղղուելէ առաջ: Անոնք Պաքուի մէջ էին Ֆրանսայի նախագահ
Ֆրանսուա Հոլլանտի այցելութեան լուսաբանման համար: Յատուկ ծառայութիւնները անոնցմէ
վերցուցած էին բոլոր սարքերն ու նկարահանած նիւթերը, իսկ անոնց ստիպած էին նստիլ Փարիզ
ուղղուող օդանաւ: