Кардынал Кох: у экуменізме сімвалічныя жэсты адыгрываюць вельмі важную ролю
Візіт папы Францішка
ў Святую Зямлю, які пачынаецца на наступным тыдні, дае новыя надзеі на будучыню экуменічнага
дыялогу, лічыць старшыня Папскай рады спрыяння хрысціянскаму адзінству кардынал Курт
Кох. Іерарх, які асабіста прыме ўдзел у пілігрымцы Святога Айца, даў інтэрв’ю Ватыканскаму
радыё. Ён нагадаў , што “падставай для гэтага візіту стала святкаванне першай сустрэчы
Патрыярха Афінагора з папам Паўлам VI 50 гадоў таму ў Іерусаліме”. Гэта было першае
такога роду спатканне пасля сапраўды доўгага часу; яно паклала пачатак дыялогу паміж
дзвюма Цэрквамі, падкрэсліў кардынал. Ён выказаў надзею, што таксама сустрэча цяперашніх
кіраўнікоў Цэркваў – папы Францішка і Патрыярха Барталамея І – будзе спрыяць паглыбленню
добрых адносін, якія назіраліся ў апошнія паўстагоддзя, і народзіць новыя надзеі на
будучыню.
Паводле кардынала, у экуменізме сімвалічныя жэсты адыгрываюць вельмі
важную ролю. “Мы павінны праводзіць адрозненне паміж дыялогам любові і дыялогам праўды,
які ў тэалагічных пытаннях не з’яўляецца простай справай. Аднак, ён не можа весціся
без дыялогу любові. І ў гэтым сэнсе сустрэча, якая набліжаецца, вельмі значная”, -
сказаў старшыня Папскай рады. Ён падкрэсліў, што Францішак прынясе ў Святую Зямлю,
у першую чаргу, пасланне міру, паяднання і братэрства для экуменічных і міжрэлігійных
адносін.