Եւրոպական Միութեան մէջ ներգաղթեալներու թիւը սուր աճ արձանագրած է
«Տէօչը Վելլը» կը հաղորդէ, որ Սահմանային պահպանութեան եւրոպական գործակալութեան` «Ֆրոնթեքս»-ի
տարեկան զեկուցումին մէջ կը նշուի, որ Եւրոպական Միութեան մէջ գաղթականներու թիւը 2013-ին
սուր աճ արձանագրած է: Գործակալութեան տուեալներով` 2013-ին Եւրոպական Միութեան սահմանները
կտրելու փորձի համար ձերբակալուած է 107 հազար ապօրինի ներգաղթեալ: Ատիկա 34,500-ով աւելի
է, քան 2012-ի թիւը: 2014-ի առաջին չորս ամիսներուն ընթացքին իշխանութիւնները արդէն ձերբակալած
են 42 հազար ներգաղթեալ: Այդ թիւը երեք անգամով կը գերազանցէ նախորդ տարիներու նոյն ժամանակաշրջանի
ցուցանիշները: Գաղթականներու մեծագոյն հոսքը արձանագրուած է Իտալիոյ մէջ: 2014-ի յունուարէն
ապրիլ երկարող ամիսներուն ընթացքին ծովու ճամբով այդ երկիր մուտք գործել փորձած են աւելի
քան 23 հազար մարդիկ: Անոնցմէ շատերը եկած են անապահով նաւակներով` Լիպիայէն եւ Եգիպտոսէն:
Նախորդ տարուան ընթացքին դէպի իտալական ափեր վտանգաւոր ճամբորդութիւնը համարձակած են
կատարել 40 հազար ապօրինի գաղթականներ: «Ֆրոնթեքս» կը յայտնէ, որ 2013-ին գաղթականները
փորձած են Եւրոպական Միութեան տարածք մտնել Սուրիայէն, Էրիթրիայէն, Աֆղանիստանէն եւ Ալպանիայէն: Գործակալութեան
պաշտօնատարներուն կարծիքով` յառաջիկայ տարիներուն անօրինական ներգաղթը պիտի աճի: Մասնաւորաբար,
հիւսիսային Ափրիկէէն եւ Թուրքիայէն աւելի շատ մարդիկ պիտի փորձեն յայտնուիլ Եւրոպական
Միութեան մէջ: