Papa: për ta njohur Jezusin duhet ta lutësh, ta kremtosh e ta imitosh, nuk mjaftojnë
studimet e idetë
Për ta njohur Jezusin, nuk mjafton studimi, nuk mjaftojnë idetë, por duhet t’i lutemi
me zemër, duhet ta kremtojmë, duhet t’i përngjasim. Kështu u shpreh Papa gjatë Meshës,
kremtuar sot në Shtëpinë e Shën Martës. Françesku i ftoi përsëri të gjithë ta lexojnë
Ungjillin i cili, nga një herë, kujtoi, mbulohet nga pluhuri në skuta, nga që nuk
hapet kurrë.
Duke komentuar
pohimin e Jezusit: “Unë jam udha, e vërteta, jeta”, Papa vërejti se njohja e Jezusit
është puna më e rëndësishme në jetën tonë. Por, pyeti më pas, si mund ta njohim Jezusin?
Ndokush mund të thotë: “Duke studiuar, atë. Duhet studiuar shumë!". Kjo është e vërtetë.
Duhet ta studiojmë katekizmin, është e vërtetë. Por vetëm studimi nuk mjafton për
ta njohur Jezusin. Disa, vijoi të shpjegojë, kujtojnë se Jezusin mund ta njohim vetëm
me ide, se vetëm idetë mund të na çojnë në njohjen e Jezusit. Edhe ndërmjet të krishterëve
të parë, disa mendonin kështu. E në fund mbeteshin të kapërthyer në mendimet e veta: “Vetëm
idetë nuk japin jetë e kush ecën vetëm nëpër rrugën e ideve, përfundon në një labirint
e nuk del kurrë më! E prandaj, që në zanafillë të Kishës, u dukën herezitë. Herezitë
s’janë tjetër, veçse përpjekja për ta kuptuar vetëm me mendjen tonë e me dritën tonë
të arsyes, kush është Jezusi. Një shkrimtar i madh anglez thoshte se herezia është
ide e çmendur. E kështu edhe është. Idetë, kur mbeten vetëm, çmenden. Kjo është rruga”. Për
ta njohur Jezusin, pohoi Papa, duhen hapur tri porta: “Porta e parë: t’i lutemi
Jezusit. E dini se studimi, pa lutjen, nuk duhet gjë. T’i lutemi Jezusit, për ta njohur
më mirë. Teologët e mëdhenj e bëjnë teologjinë në gjunjë. T’ i lutemi Jezusit! E sa
me studim, aq me lutje, t’i afrohemi sadopak… Por pa lutjen nuk mund ta njohim kurrë
Jezusin. Kurrë! Kurrë! Porta e dytë: ta kremtojmë Jezusin. Nuk mjafton lutja, është
i nevojshëm gëzimi i kremtimit. Ta kremtojmë Jezusin në sakramentet e veta, sepse
aty na jep jetë, na jep forcë, na jep ushqim, na jep ngushëllim, na jep besë, na jep
mision. Pa kremtimin e sakramenteve, nuk arrijmë ta njohim Jezusin. E kjo i takon
vetëm Kishës: kremtimi. Porta e tretë: t’i përngjajmë Jezusit. Ta marrim në dorë Ungjillin
e të pyesim veten: ç’bëri Ai? Si e kaloi jetën? Çka na tha, çka na mësoi? E pastaj
të përpiqemi për t’i ngjarë”. Të hyjmë përmes këtyre tri portave, tha Papa,
do të thotë të hysh në misterin e Jezusit. E vetëm po të jemi të aftë të hyjmë në
misterin e tij, mund ta njohim Jezusin. Kjo do të thotë të lutesh, të kremtosh e të
imitosh. E kështu do të gjejmë udhën, për të shkuar drejt së vërtetës e jetës: “Mundemi
sot, gjatë ditës, të pyesim për portën e lutjes në jetën tonë; për lutjen që del nga
zemra, jo atë të papagalit! Ajo e zemrës, si shkon? Si shkon kremtimi i krishterë
në jetën time? Si duhet t’i përngjaj? Vërtet nuk kujtohesh? Sepse libri i Ungjillit
është plot me pluhur, meqë nuk hapet kurrë! Merre librin e Ungjillit, hape e do të
të tregojë si mund t’i ngjash Jezusit! Të mendojmë për këto tri porta, si janë në
jetën tonë, e do të na bëjë mirë!”.