Թուրքիոյ մէջ փրկարարներ չորեքշաբթի, 14 մաղիսին, մեծ ջանքեր գործադրեցին` գտնելու համար
հանքափորներ, որոնք պայթումի մը պատճառով բանտարկուած են ածխահանքի մը մէջ: Ածխահանքի
փլուզումը առնուազն 238 զոհ պատճառեց: Թուրքիոյ ուժանիւթի նախարար Թաներ Եըլտըզ յայտնեց,
որ պայթումին ընթացքին աշխատանքին մէջ 787 մարդիկ կը գտնուէին: Կը կարծուի, որ տակաւին
200 հանքափորներ հանքին մէջ կը գտնուին, սակայն փրկուածներ գտնելու յոյսերը կը չքանան: Տասնեակներով
հանքափորներ յաջողեցան փրկուիլ մայրաքաղաք Անգարայէն 450 քիլոմեթր հեռաւորութեան վրայ
գտնուող Սոմայի մէջ փլուզուած հանքէն: Հանքափորներէն շատեր չեն կրնար առանց օգնութեան
դուրս գալ հանքէն, որովհետեւ ելեկտրական հոսանքի անջատման պատճառով վերելակները չեն աշխատիր:
Ներկայիս փրկարարները թթուածինով կը լեցնեն հանքահորը, որպէսզի ողջ մնացածները չթունաւորուին: Թուրքիոյ
վարչապետ Ռեճեփ Թայիփ Էրտողան յետաձգեց Ալպանիա երէկ նախատեսուած իր այցելութիւնը եւ
ուղղուեցաւ դէպքին վայրը: Վարչապետը նաեւ երկրին մէջ եռօրեայ սուգ յայտարարեց: Թուրքիոյ
ամէնէն վատ հանքահորի աղէտը արձանագրուած է 1992-ին, երբ Սեւ ծովու շրջանին մէջ` Զոնկուլտաքի
մօտ 270 հանքափորներ մահացան: Այս աղէտալի հանքահորի արկածի ի լուր, Ֆրանչիսկոս Սրբազան
Քահանայապետը, հինգշաբթի, 14 մայիսին, թուիթերեան կայքին վրայ հրատարակելով նոր թուիթ
մը, կը հրաւիրէ՝ աղօթել հանքահորի զոհերուն եւ անոնց հարազատներուն համար։