Няма хрысціяніна без
Касцёла, хрысціяніна-адзіночкі, адзначыў папа Францішак падчас ранішняй Эўхарыстыі
ў Доме св. Марты 15 мая 2014 г. Пантыфік звярнуў увагу на тое, што апосталы падчас
абвяшчэння Евангелля пачыналі з гісторыі ізраільскага народа. Сапраўды, “Езуса нельга
зразумець без гэтай гісторыі”, таму што Ён з’яўляецца мэтай, да якой уся яна імкнулася,
адзначыў Святы Айцец і дадаў, што Бог мае гісторыю і без яе ведання Яго немагчыма
зразумець. Тое ж, на думку Пантыфіка, тычыцца і кожнага хрысціяніна – нельга зразумець
хрысціянства без гісторыі, без народа, без Касцёла. Прыналежнасць да Касцёла – гэта
частка хрысціянскай ідэнтычнасці. “Без гэтага мы – не хрысціяне”, - падкрэсліў Папа,
гаворачы аб важнасці хрысціянскай гістарычнай памяці.
Касцёл – гэта народ,
які крочыць у накірунку поўні, у накірунку спаўнення абяцання, якое атрымаў ад Бога,
нагадаў Святы Айцец, менавіта таму хрысціянаў называюць людзьмі надзеі. Пантыфік заклікаў
вернікаў прасіць у Бога аб ласцы памяці, каб глядзець у мінулае; ласцы надзеі, каб
глядзець у будучыню; і ласцы штодзённага абнаўлення запавету з Панам, Які нас палікаў.
Гэта, на думку Францішка, неабходна для захавання хрысціянскай ідэнтычнасці.