Dita e familjes. Imzot Palja në OKB: ta vendosim familjen në qendër të politikës
U kremtua sot Dita XX Botërore e Familjes, e cila kremtohet çdo vit, më 15 maj, sipas
datës së caktuar nga OKB-ja. Përfaqësia diplomatike e Selisë së Shenjtë në Kombet
e Bashkuara propozoi një takim në selinë e organizatës ndërkombëtare, në të cilin
foli edhe kryetari i Këshillit Papnor për Familjen, imzot Vinçenco Palja. E ftuam
telefonikisht në mikrofonin tonë, për ta pyetur cili është kontributi e dëshmia që
mund të japë familja e krishterë për familjen jo besimtare. Ta dëgjojmë: Unë besoj se
familja e krishterë ka përgjegjësi, jo aq në formimin e një familjeje të ndryshme,
por ka për detyrë të thellojë vlerat e familjes njerëzore në përgjithësi. E jo më
kot, në Kombet e Bashkuara, unë fola për familjen si pasuri, si burim, së bashku me
rabinin argjentinas Skorka, me kreun mysliman të një seksioni të OKB-së, El Naser
dhe me një grua nigeriane, duke dëshmuar afërsinë tonë me tragjedinë e atij vendi.
Pra, kemi një pasuri të përbashkët, që duhet vlerësuar e propozuar. Veçoria e perspektivës
së krishterë është kjo: dashuria, ose bekimi i Zotit, që marrin bashkëshortët e krishterë,
nënvizon se dashuria familjare nuk është egocentrike, nuk mbyllet mes mureve të shtëpisë,
por është dashuri, që të nxit t’i kapërcesh të gjitha kufinjtë. Prandaj, familja e
krishterë i kapërcen kufinjtë dhe lidhet me familje të tjera; kapërcen prirjen për
të parë vetëm vetveten dhe shkon drejt të varfërve… Pra, ajo dashuri që merret si
dhuratë ditën e martesës të çon deri në periferitë e planetit. Pra, familja
e krishterë duhet të promovojë integrimin shoqëror dhe solidaritetin ndërmjet brezave.
Ç’duhet bërë më tej? Mendoj se është e dosmodoshme të riformohet lidhja ndërmjet
brezave, që kalon përmes procesit të edukimit, pjesë e misionit të Kishës. Sot, flitet
për “avullimin” e babait: ç’do të thotë kjo? Shumë baballarë e kanë braktisur impenjimin,
përgjegjësinë që kanë. T’i thuash fëmijës “jam si vëllai yt” do të thotë të mos e
kuptosh përgjegjësinë që ke për të si prind. Prirja evropiane për të krijuar familje
me një person, do të thotë se jemi larguar nga lidhjet me të tjerët. Lidhjen për gjithë
jetën me një tjetër e konsiderojmë të padurueshme. Kjo do të thotë se vetëm “uni”
ka rëndësi. Është mënyra më e frytshme për ta shkatërruar nga brenda shoqërinë e jetën
e përbashkët ndërmjet njerëzve.