Përshëndetja e Papës drejtuar banorëve të “tokës së zjarreve”: e drejta e shëndetit
vjen para çdo interesi tjetër
Në audiencën e përgjithshme, duke iu drejtuar shtegtarëve italianë, Papa përshëndeti
delegacionin e banorëve të atij trualli, që tashmë njihet kudo me emrin “toka e zjarreve
dhe e helmeve”, në Kampania. Nënvizoi Ati i Shenjtë në përshëndetje: “Duke u shprehur
banorëve afërsinë time, uroj që dinjiteti i njeriut dhe të drejtat për të gëzuar shëndet
të plotë, të vihen gjithnjë para çdo interesi tjetër” Pastaj përshëndeti me
përzemërsi besimtarët e Sardenjës, shoqëruar nga barinjtë e tyre e nga autoritetet,
për t’i kthyer Atit të Shenjtë vizitën që pati nderin të bëjë vitin e kaluar, në këto
troje: “Të dashur miq, ju falënderoj për praninë tuaj dhe ju inkurajoj t’i përballoni
situatat problematike, që trondisin ende Ishullin tuaj të bukur, me shpresë e solidaritet.
Ju siguroj se nuk ju kam harruar e se lutem për ju. I kujtoj gjithnjë fjalët që më
thatë për problemet e mprehta të Sardenjës. Ju siguroj se më keni përherë pranë!”. Më
pas Papa përshëndeti Bijat e Shën Kamilit, që po kremtojnë Kapitullin e tyre të përgjithshëm,
duke i nxitur të jenë shenjë gazmore e dashurisë së Zotit ndërmjet të sëmurëve e të
vuajturve. Një përshëndetje tjetër, në një Shesh plot me grupe e njerëz të veçantë,
të cilët Françesku nuk lodhet kurrë duke i përqafuar, duke u shtrënguar duart a duke
u thënë një fjalë të mirë: “Përshëndes pjesëmarrësit në shtegtimin organizuar
nga Vepra e Vogël e Shpërblimit në 100-vjetorin lindjes së themeluesit, atë Arturo
d’Onofrio; të jeni mjet paqeje e pajtimi në çdo situatë e në çdo mjedis. Përshëndes Shoqatën Kultura e Solidariteti të Milanos si dhe grupet e Unitalsi-t,
ardhur nga zona të ndryshme, e i ftoj të gjithë ta dëgjojnë zërin e Shpirtit Shenjt,
duke e bërë veprues në jetë, përmes së mirës”.
“Përshëndes të rinjtë,
të sëmurët e të posamartuarit. Virgjëra Mari, që e nderojmë në mënyrë të posaçme këtë
muaj të majit, qoftë mësuese e dhimbsur për ju, të dashur të rinj, posaçërisht për
ju, studentë të Institutit Setembrini të Romës; ju ndihmoftë ju, të dashur
të sëmurë, në çastet më të vështira të vetmisë e të vuajtjes; qoftë shembull
për ju, të dashur bashkëshortë të rinj, që të jetoni në bashkim e harmoni familjare”.