Ռայի Պատրիարքը հանդիպումներ կ՛ունենայ Ժեմայէլի եւ Նատեր հարիրիի հետ
Նախագահական ընտրութեան վերաբերող զարգացումները քննարկելու շրջագիծին մէջ մարոնի համայնքի
Պշարա Ռայի պատրիարքը երէկ կէսօրէ առաջ ընդունեց Փաղանգաւոր կուսակցութեան ղեկավար Ամին
Ժեմայէլը: Հանդիպումէն ետք Ժեմայէլ ընդգծեց սահմանադրական ժամկէտի սահմաններուն մէջ
նախագահի ընտրութեան կարեւորութիւնը` աւելցնելով, որ անիշխանութիւնը կը քանդէ պետական
բոլոր հաստատութիւնները, հետեւաբար պէտք է կանխարգիլել զայն: Ժեմայէլ նշեց, որ նախագահական
ընտրութեան թղթածրարին առումով Մարտ 14-ի քաղաքական ուժերուն միջեւ ներդաշնակութիւն գոյութիւն
ունի: Ան նշեց, որ նախկին վարչապետ Սաատ Հարիրիի եւ երեսփոխան Սամի Ժեմայէլի միջեւ
Փարիզի մէջ տեղի ունեցած հանդիպումը այդ ուղղուածութեան հիման վրայ կատարուած է: Ժեմայէլ
ընդգծեց, որ Հարիրի յանձնառու է երկրին սահմանադրական հաստատութիւններուն գործունէութեան
եւ անոնց մէջ քրիստոնեայ համայնքին պատասխանատուութիւններուն: Ան շեշտեց, որ Լիբանանի
միակ փրկութիւնը զինք բաղկացնող տարրերուն միջեւ խորհրդակցութիւնն է: «Չեմ կարծեր, որ
Հարաւային արուարձանները Լիբանանի աշխարհագրութենէն դուրս կը գտնուին: Մենք ոչ մէկ ատեն
այդպէս կրնանք մտածել եւ մեզի համար կարեւոր է, որ լիբանանեան քաղաքական բոլոր ուժերը
այս հանգրուանին ստանձնեն իրենց պարտականութիւնները: Մենք կը փորձենք Լիբանանը դուրս
բերել հարցերէն եւ այդ ճահիճէն, որուն մէջ կը գլորի տարիներէ ի վեր», ըսաւ ան: Աւելի
ուշ Ռայի պատրիարքը հանդիպում մը ունեցաւ Սաատ Հարիրիի ներկայացուցիչ Նատեր Հարիրիի հետ,
որ պատրիարքին փոխանցեց նախկին վարչապետին մտահոգութիւնը` հաւանական անիշխանութեան մասին: Հարիրի
յայտնեց, որ կարեւորագոյնը այն է, որ Լիբանանի քրիստոնեայ բաղկացուցիչը մնայ երկրին խորհրդանիշը
եւ նախագահական ընտրութիւնը կատարուի սահմանադրութեամբ ճշդուած թուականին