Святы Айцец напісаў ліст Патрыярху Копцкай Праваслаўнай Царквы
Пантыфік напісаў ліст
да Патрыярха Копцкай Праваслаўнай Царквы Тавадраса ІІ у сувязі з першай гадавінай
іх сустрэчы ў Рыме 10 мая 2013 г. Францішак дзякуе Богу за сумеснае “падарожжа паяднання
і сяброўства”, на якім дзве Царквы імкнуцца “лепш зразумець адна адну і будаваць трывалую
аснову для пераадолення даўніх рознагалоссяў”. На думку Папы, існуе ўзаемнае ўсведамленне
таго, што аб’ядноўваючых фактараў больш за раздзяляючыя. І гэта дапамагае “з верай
у дапамогу Божай ласкі” імкнуцца да пераадолення перашкод на шляху да поўных зносін.
Святы Айцец заклікаў маліцца за гэта і са свайго боку запэўніў Тавадраса ІІ у няспыннай
малітве за ўсіх хрысціян у Егіпце і на Блізкім Усходзе. “Няхай Пан натхняе тых, хто
адказвае за лёс народаў на гэтых землях, з цвёрдай рашучасцю дамагацца справядлівых
і мірных рашэнняў, якія асноўваюцца на павазе да правоў усіх людзей”, - напісаў Папа.
Францішак назваў памятную дату “днём сяброўства паміж коптамі і католікамі”.