Յոյն ուղղափառներու տիեզերական պատրիարք Բարթողիմէոս Ա.-ը ԱՖՓ լրատու գործակալութեան
հետ հարցազրոյցի մը ընթացքին գովաբանեց Թուրքիոյ վարչապետ Ռեճեփ Թայիփ Էրտողանը` քրիստոնեաներուն
իրաւունքները բարելաւելու համար, սակայն ընդգծեց, որ անոր քայլերը «բաւարար չեն»: Բարթողիմէոս
Ա. յուսախաբութիւն յայտնեց, որ Էրտողան չէ վերաբացած ուղղափառ եկեղեցւոյ ամէնէն կարեւոր
դպրեվանքը` Հալքիի աստուածաբանական դպրոցը: «Ասոնք յոյսեր են, որոնք տակաւին չեն իրականացած»,
նշեց ան` աւելցնելով. «Ասիկա մարդկային իրաւանց եւ մասնաւորաբար կրօնական ազատութեան
հարց մըն է»: «Ես Թուրքիոյ քաղաքացի մըն եմ եւ այստեղ ծնած եմ: Երկու տարի թրքական
բանակին մէջ ծառայեցի: Իբրեւ Թուրքիոյ քաղաքացի իմ բոլոր իրաւունքներս կ՛ուզեմ եւ ոչ
միայն ինծի համար, այլեւ` եկեղեցիիս եւ համայնքիս համար», ըսաւ ան: Բարթողիմէոս Ա.
նշեց, որ Էրտողան բարելաւած է Թուրքիոյ մէջ քրիստոնեաներուն իրաւունքները` աւելցնելով,
որ մինչ ժամանակին յոյները զանգուածաբար հեռացան Թուրքիայէն, անոնցմէ շատեր ներկայիս
կը վերադառնան, մասնաւորաբար Յունաստանի տնտեսական տագնապին պատճառով: «Մենք կը ճանչնանք
այդ քայլերը, մեր երախտապարտութիւնը կը յայտնենք պրն. Էրտողանին, սակայն կ՛ըսենք, որ
բաւարար չէ», ընդգծեց ան: Յոյն ուղղափառներու պատրիարքը նաեւ յայտնեց, որ Երուսաղէմի
մէջ հանդիպում պիտի ունենայ Ֆրանչիսկոս պապին հետ, եւ այդ հանդիպումը երկու եկեղեցիները
իրարու պիտի մօտեցնէ` շուրջ հազարամեայ պառակտումին վերացման համար: