Святы Айцец выказаў
поўную падтрымку намаганням тых, хто імкнецца, каб асноўнае права чалавека на жыццё
з моманту зачацця да натуральнай смерці мела адпаведную прававую абарону. Аб гэтым
гаворыцца ў пасланні да ўдзельнікаў канадскага “Маршу для жыцця”, які прайшоў 8 мая
2014 г. перад парламентам у Атаве. Дакумент ад імя Пантыфіка падпісаў кардынал Дзяржсакратар
Пьетра Паралін. 17-ы “Нацыянальны марш для жыцця” сабраў тысячы ўдзельнікаў. У ім
узялі ўдзел між іншым арцыбіскуп Атавы Тэрэнс Прэндэргаст, кардынал Томас Колінз з
Таронта і старшыня мясцовага епіскапату, арцыбіскуп Поль-Андрэ Дзюрашэ. Папскае пасланне
прачытаў Прымас Канады, кардынал Жэраль Сіпрыен Лакруа. Святы Айцец выказаў у ім жаданне,
каб “Марш за жыццё”, які прайшоў таксама ў іншых дыяцэзіях Канады, выклікаў большую
павагу да непарушнага права на жыццё кожнага чалавека, ад зачацця да натуральнай смерці.
Учарашняе
мерапрыемства сцісла звязана са святкаваннем Нацыянальнага тыдня для жыцця і сям’і,
які Касцёл у Канадзе будзе адзначаць другі раз з 11 па 18 мая. Ён з’яўляецца часткай
спецыяльнай душпастырскай праграмы “Фарміраванне культуры жыцця і сям’і ў Канадзе”,
абвешчанай епіскапатам у 2011 г. у сувязі з Годам веры.