Փութին Ռուսամէտներուն կոչ կ՛ուղղէ Ուքրանիայէն անջատուելու շուրջ հանրաքուէն յետաձգելու
Ռուսիոյ նախագահ Վլատիմիր Փութին չորեքշաբթի, 7 մաղիսին, Ուքրանիոյ մէջ ռուսամէտներուն
կոչ ուղղեց անկախութեան շուրջ հանրաքուէն յետաձգելու: Ան ըսաւ, որ կիրակի օր հարաւարեւելեան
Ուքրանիոյ մէջ նախատեսուած քուէարկութիւնը պէտք է յետաձգուի` «երկխօսութեան համար անհրաժեշտ
մթնոլորտ ստեղծելու նպատակով»:Ան Մոսկուայի մէջ ԵԱՀԿ-ի ընդհանուր քարտուղարին հետ հանդիպումէ ետք նաեւ ըսաւ, որ ինք պատրաստ է «այս տագնապին ելքեր փնտռելու»:
Բրիտանիոյ արտաքին գործոց նախարար Ուիլիըմ Հէյկ երէկ Քիեւի մէջ զգուշացուց, որ Ուքրանիոյ միասնականութիւնն ու անկախութիւնը վտանգուած են: Ան Ռուսիան ամբաստանեց արեւելեան եւ հարաւային Ուքրանիոյ մէջ տագնապ եւ գրգռութիւններ «կազմակերպել փորձելու» յանցանքով: Հէյկ նշեց, որ Մոսկուայի «անմիջական նպատակը» 25 մայիսին նախատեսուած Ուքրանիոյ նախագահական ընտրութիւնը խանգարելն է, «թէեւ անշուշտ անոնք թերեւս կը փորձեն միջամտութեան պատրուակ մը ստեղծել»:
Միւս կողմէ, ռուսամէտ զինեալներ երէկ ուքրանական ապահովական ուժերու կողմէ հարաւային Ուքրանիոյ նաւահանգիստներէն Մարիուփոլի քաղաքապետարանի շէնքէն վտարուելէ քանի մը ժամ ետք վերագրաւեցին զայն եւ ուքրանական դրօշը անոր վրայէն վար առին:
| All the contents on this site are copyrighted ©. |