Հայաստանէն արտագաղթողներու թիւը առաջին եռամսեակին կրճատուած է
Ռուսաստանի մէջ գաղթականութեան քաղաքականութեան խստացումը կրճատած է Հայաստանէն արտագաղթողներուն
թիւը: Այս մասին կը հաղորդէ civilnet.am-ը: Ռուսաստանի մէջ գաղթականութեան օրէնսդրութեան
խստացումը անդրադարձած է Հայաստանէն արտագաղթի ընթացքին վրայ: Այս տարուան առաջին եռամսեակին
Հայաստանէն մեկնածներուն թիւը կրճատուած է 14,2%-ով: Համաձայն Ազգային վիճակագրական
ծառայութեան (ԱՎԾ) միջազգային սահմանահատումներուն վերաբերեալ տուեալներուն` 2014թ. առաջին
եռամսեակին միջազգային ուղեւորահոսքերու բացասական մնացորդը (հանրապետութենէն մեկնողներու
թիւի գերազանցումը ժամանողներու թիւին) կազմած է 31,8 հազար մարդ, որուն 28,5 հազարը`
ՀՀ քաղաքացիներ: Համեմատութեան համար` 2013թ. առաջին եռամսեակին մեկնողներուն թիւը ժամանողները
գերազանցած էր 37 հազարով: Փաստացի, այս տարի Հայաստանը լքած քաղաքացիներուն թիւը 2013թ.
առաջին եռամսեակին համեմատ պակաս է 5,3 հազարով կամ 14,2%-ով: Գաղթականութեան բացասական
հաշուեկշիռի կրճատումը կապուած է քանի մը առարկայական գործօնով: Իբրեւ կանոն՝ տարուան
առաջին ամիսներուն Հայաստանէն մեկնողներու զգալի մասը արտագնայ աշխատանք որոնողներն են,
որուն մասին կը վկայէ այն, որ բացասական հաշուեկշիռի 75%-ը բաժին հասած է օդային փոխադրամիջոցին: Արտագնայ
աշխատանքի մեկնողներու հիմնական մասը կ’ուղղուի Ռուսաստան, ուր 2014թ. Յունուար 1-էն
տեղի ունեցած է գաղթականութեան օրէնսդրութեան խստացում (առանց վիզա մուտքի իրաւունք ունեցող
պետութիւններու քաղաքացիները 180 օրուայ ընթացքին ՌԴ-ի մէջ կրնան գտնուիլ միայն 90 օր):
Նախնական գնահատականներով` մօտ 50 հազար ՀՀ քաղաքացիներու մուտքը Ռուսաստան յառաջիկայ
3-5 տարիներուն արգիլուած է: Միւս կողմէ, նախորդ տարիներու արտագաղթին հետեւանքով
Հայաստանի մէջ նուազած են աշխատանքային միջոցները, քանի որ այս ընթացքին մեկնածներու
մէկ մասը չէ վերադարձած եւ մշտական բնակութիւն հաստատած է արտերկրի մէջ: Արտագաղթի
հետեւանքով Հայաստանի մէջ աշխատանքային միջոցներու նուազում արձանագրած է նաեւ Ազգային
վիճակագրական ծառայութիւնը: Այսպէս, 2013-ին Հայաստանի տնտեսական բնակչութեան թիւը կրճատուած
է 29,5 հազարով, 2012-ին` 22,6 հազարով, 2011-ին` 22,4 հազար մարդով: