Ватыканская абсерваторыя правядзе курсы для моладзі
Ватыканская абсерваторыя
правядзе курсы для маладых астраномаў на тэму “Галактыкі блізкія і далёкія, новыя
старажытныя”. Заняткі пачнуцца 1 чэрвеня 2014 г. і працягнуцца чатыры тыдні. У іх
прымуць удзел 25 студэнтаў і маладых даследчыкаў з 22 краін свету, а таксама два семінарысты
– з Італіі і Канады. Яны былі выбраны са 100 кандыдатаў, якія падавалі свае заяўкі
для ўдзелу ў ініцыятыве. Летнія курсы пройдуць у прэстыжнай Астранамічнай абсерваторыі
Апостальскай Сталіцы, якая знаходзіцца на тэрыторыі Папскіх віл у Кастэль-Гандольфа.
Выкладчыкамі будуць навукоўцы з ЗША і Вялікабрытаніі.
“Фарміраванне і эвалюцыя
галактыкаў – гэта галоўны аб’ект вывучэння ў сучаснай астраноміі”, адзначыў дырэктар
Ватыканскай абсерваторыі айцец Хасэ Габрыэль Фунэс. Паводле навукоўцы, новыя радыётэлескопы
і касмічныя тэлескопы, а таксама складаныя лічбавыя сістэмы ставяць пад сумніў існуючыя
тэорыі аб новых і старажытных галактыках. Курсы стануць магчымасцю падзяліцца з маладымі
астраномамі вынікамі апошніх даследванняў, а таксама пазнаёміць іх з самым сучасным
астранамічным абсталяваннем.
Астранамічная абсерваторыя Апостальскай Сталіцы
арганізуе летнія курсы для моладзі з 1986 г. Іх мэта – даць магчымасць паглыбіць веды,
спрыяць новым сяброўствам і кантактам паміж маладымі і дасведчанымі даследчыкамі на
міжнародным узроўні.