Papa në lutjen e Mbretëreshës Qiellore: Fjala e Zotit dhe Eukaristia na mbushin me
gëzim
Sot, duke i drejtuar uratën Mbretëreshës Qiellore, Papa u lut që në Ukrainë të fitojnë
ndjenjat e paqësimit e të vëllazërisë. Shprehu edhe dhimbjen për viktimat e shkaktuara
nga një shkarje vigane dheu, mbi një fshat të Afganistanit. Duke kujtuar fragmentin
ungjillor, në të cilin Jezusi i ngjallur u duket dy dishepujve të Emmausit, Ati i
Shenjtë nënvizoi se Fjala e Zotit dhe Eukaristia na e mbushin shpirtin me gëzim.
Shpresa
se paqja do të fitojë në Ukrainë, ishte sot në qendër të vëmendjes, në lutjen e Papës
Françesku: “Të dashur vëllezër e motra, dëshiroj t’ju ftoj t’ia besoni
Zojës situatën në Ukrainë, ku nuk reshtin tensionet. Lutem me ju për viktimat e këtyre
ditëve, duke kërkuar që Zoti të dikojë në zemrat e të gjithëve ndjenja paqësimi e
vëllazërie”. Ati i Shenjtë kujtoi edhe tragjedinë e shkarjes së dheut në
Afganistan, që varrosi një fshat të tërë, në veri-lindje të vendit: “Lutemi
edhe për të vdekurit për shkak të shkarjes vigane të dheut, që u dynd, dy ditë më
parë, mbi një fshat të Afganistanit. Zoti i Gjithëpushtetshëm, që e di emrin e secilit
prej tyre, i pranoftë në paqen e tij e u dhëntë forcë të gjallëve për të ecur përpara,
me ndihmën e njerëzve, që do të përpiqen për t’ua lehtësuar vuajtjet”. Gjatë
lutjes së Mbretëreshës Qiellore, Papa kujtoi Ungjillin, në të cilin dy dishepuj, pas
vdekjes së Jezusit, e lënë pas Jeruzalemin, të trishtuar e të ligështuar në shpirt,
për t’u kthyer në fshatin e tyre. E në sa ishin për udhë, u duket Jezusi i ngjallur
e ata e njohin vetëm në të thyer të bukës, shenjë e re e pranisë së Zotit ndërmjet
njerëzve. Udha e Emmausit, shpjegoi Papa, bëhet kështu, simbol i udhës sonë të fesë: “Shkrimet
e Shenjta dhe Eukaristia janë elemente të domosdoshme për takimin me Zotin. Edhe ne,
nganjëherë, shkojmë në Meshën e së Dielës me shqetësimet tona, vështirësitë, zhgënjimet.
Jeta, shpesh, nga hap plagë e ne vijojmë, gjithë trishtim udhën kah ‘Emmausi’ ynë,
duke i kthyer shpinën planit të Zotit. Largohemi nga Zoti”. Por, kur arrijmë,
tha në vijim Papa, na pret Liturgjia e Fjalës së Zotit: “Jezusi na
i shpjegon Shkrimet e Shenjta e zë e ndizet përsëri në zemrat tona zjarri i fesë e
i shpresës, pastaj vjen, në Kungim, e na jep forcë”. Ati i Shenjtë në
vijim, i nxiti besimtarët ta njohin e ta pranojnë Fjalën e Zotit e ta marrin Krishtin
në zemër, në Eukaristi: “Kujtojeni mirë këtë: lexoni çdo ditë një fragment
të Ungjillit e, të dielave, shkoni e merreni Kungimin, merreni Jezusin. Kështu ndodhi
me dishepujt e Emmausit: e pranuan Fjalën e Zotit, thyen me të copën e bukës e trishtimi
u zhduk e ata nuk e ndjenë më shijen e hidhur të disfatës, por u mbushën plot me
gëzim. Gjithnjë, të dashur vëllezër e motra, Fjala e Zotit dhe Eukaristia na mbushin
me gëzim”. Më pas Ati i Shenjtë pohoi: “Kujtoju mirë! Kur ti je
i trishtuar, kur diçka nuk shkon, merre në dorë Fjalën e Zotit. Kur jeta të ligështon,
merre Fjalën e Zotit e shko të dielën në Meshë e kungoju! Merr pjesë në misterin e
Jezusit! Fjala e Hyjit, Eukaristia, na mbushin me gëzim”. Pas lutjes së
Mbretëreshës Qiellore, Papa Françesku kujtoi se sot kremtohet Dita e 90-të Kombëtare
e Universitetit Katolik të Zemrës së Krishtit, tema e së cilës, sivjet, ishte: “Me
të rinjtë, protagonistë të ardhmërisë”. E, duke iu drejtuar të rinjve të pranishëm
në Shesh, u tha: “Lutem për këtë Universitet të madh, që të jetë gjithnjë
besnik ndaj misionit të zanafillës e në përkim me botën e sotme. Në dashtë Zoti, do
të shkoj së shpejti të vizitoj, këtu, në Romë, Fakultetin e Mjekësisë e të Kirurgjisë
si dhe Poliklinikën “Gemelli’, që mbush 50 vjet jete”. Papa përshëndeti,
më në fund, edhe pjesëmarrësit e Marshimit për jetën si dhe shoqatën “Meter”, që pothuajse
prej njëzet vjetësh, lufton kundër çdo lloj forme të shpërdorimit mbi të miturit.
Ati i Shenjtë i falënderoi të gjithë për impenjimin e tyre, për të shqiptuar pastaj
përshëndetjen aq njerëzore, që u prit me një stuhi duartrokitjesh:“Të gjithëve
ju uroj të diel të gëzuar. Drekën e mirë e mirupafshim!”.