Հայաստանը կը մասնակցի Պուէնոս Այրեսի գիրքի միջազգային ցուցահանդէսին
Պուէնոս Այրեսի մէջ Ապրիլ 24-Մայիս 12 կ’ընթանայ Գիրքի 40-րդ միջազգային ցուցահանդէսը:
Քառասունէ աւելի երկիրներու մէջ առանձին տաղաւարով ներկայացուած է նաեւ Հայաստանը, եւ
Մայիս 1-ին աւանդաբար նշուեցաւ Հայաստանի Հանրապետութեան օրը: Այս մասին կը տեղեկացնեն
ՀՀ արտաքին գործոց նախարարութեան մամուլի, տեղեկատւութեան եւ հասարակայնութեան հետ կապի
վարչութենէն: Արժանթինի մէջ ՀՀ դեսպանութեան հովանաւորութեամբ եւ Արժանթինի “Հայ կեդրոն”-ի
օժանդակութեամբ ցուցահանդէսի “Խոսէ Էրնանտես” սրահին մէջ կայացաւ օրուան հիմնական ձեռնարկը,
որուն ներկայ էին աւելի քան 1600 հանդիսականներ: Բացման խօսքով հանդէս եկաւ Արժանթինի
մէջ ՀՀ դեսպան Վահագն Մելիքեան: Ելոյթներ ունեցան Պուէնոս Այրեսի քաղաքային խորհուրդի`
Մարդու իրաւունքներու եւ մշակութային բազմազանութեան հարցերով փոխքարտուղար Քլաուտիօ
Աւրուխը եւ թուրք մտաւորական ու ակտիւիստ, մարդու իրաւունքներու պաշտպան Ռակիփ Զարաքոլուն: Իր
ելոյթին մէջ դեսպան Մելիքեան, մասնաւորապէս, նշեց. “Արդէն 40 տարի շարունակ Պուէնոս Այրեսում
անցկացուող Գրքի միջազգային ցուցահանդէսը վերածւում է իւրօրինակ ու գեղեցիկ մի տօնի,
որը ոչ միայն հնարաւորութիւն է տալիս տարբեր ազգերի ներկայացուցիչներին ծանօթանալու համաշխարհային
գրականութեանը, այլ նաեւ իր մէջ կրում է մարդկանց գրքին մօտեցնելու, գրքի նկատմամբ սէր
արթնացնելու, միջմշակութային երկխօսութիւն ծաւալելու, փոխըմբռնում եւ հանդուրժողականութիւն
խրախուսելու խորհուրդը”: Փոխքարտուղար Քլաուտիօ Աւրուխ իր ելոյթին մէջ անդրադարձաւ
հայ – արժանթինեան քաղաքական եւ մշակութային յարաբերութիւններուն, Արժանթինի մէջ հայ
համայնքի դերին ու նշանակութեան` կարեւոր համարելով համայնքի արժէքաւոր ներդրումը երկրի
քաղաքական, հասարակական եւ մշակութային կեանքին մէջ: Անդրադառնալով Հայոց Ցեղասպանութեան
միջազգային ճանաչման եւ դատապարտման խնդիրին, ինչպէս նաեւ այդ ուղղութեամբ Արժանթինի
իշխանութիւններու հետեւողական քայլերուն` Քլաուտիօ Աւրուխը տեղեկացուց, որ Հայոց Ցեղասպանութեան
100-րդ տարելիցին ընդառաջ` Պուէնոս Այրեսի քաղաքային իշխանութիւններուն որոշումով մայրաքաղաքի
“Բալերմօ” թաղամասին մէջ անվճար տարածք պիտի յատկացուի Հայոց Ցեղասպանութեան թանգարանի
կառուցման համար: Թուրք լրագրող, մտաւորական Ռակիփ Զարաքոլուն, իր ելոյթին մէջ՝ դատապարտելով
Օսմանեան Թուրքիոյ կողմէ Հայոց Ցեղասպանութեան իրականացումը՝ ինչպէս նաեւ Թուրքիոյ ներկայ
իշխանութիւններուն կողմէ վարուող ժխտողական քաղաքականութիւնը, անդրադարձաւ Ցեղասպանութեան
նահատակ հայ մտաւորականներու` Ռուբէն Սեւակի, Սիամանթոյի, Դանիէլ Վարուժանի, Գրիգոր Զոհրապի
եւ այլոց դաժան սպանութիւններուն: Ան նաեւ տեղեկացուց, որ Ֆրանց Վերֆելի “Մուսա լերան
քառասուն օրը” պատմավէպի թուրքերէն թարգմանութիւնն ու հրատարակութիւնը կատարուած է իր
կողմէ, որուն համար ան թրքական ինքնութիւնը վիրաւորելու մեղադրանքով դատապարտուած է ազատազրկման: