Լաթաքիոյ հիւսիսային շրջաններուն մէջ, մասնաւորապէս Քեսապի մերձակայքը, կը շարունակուի
սուրիական օրինաւոր բանակին եւ ծայրայեղ իսլամ զինուած խմբաւորումներուն միջեւ բախումները:
Ըստ «Լաթաքիոյ տեղեկատուական ցանց»ի «Ֆէյսպուք»ի էջին՝ ռազմական աղբիւրներ տեղեկացուցած
են, որ Քեսապի Այն Տալպա շրջանին մէջ սպաննուած են տասնեակ զինեալներ, որոնց մեծամասնութիւնը
սուրիացի չէ: Այս մասին կը յայտնէ Armenpress-ը։ Աղբիւրը կը տեղեկացնէ նաեւ, որ Լաթաքիա
քաղաքին մէջ երկու ուժգին պայթումներ տեղի ունեցած են: Հրթիռներէն մէկը ինկած է Պասաթին
Ռիհան մզկիթի մերձակայքը, իսկ երկրորդը՝ Սաուրա ազատուղիին ուղղութեամբ: Զոհերու եւ վիրաւորներու
մասին տեղեկութիւններ չկան: Վերջին քանի մը օրերուն, սուրիական բանակը ռազմավարական
նշանակութիւն ունեցող կարեւոր կէտեր գրաւած է: Բանակը զգալի յառաջխաղացք արձանագրած
է Քեսապի մէջ՝ վերահսկողութիւն հաստատելով Թուրքիոյ հետ սահմանին վրայ գտնուող Գարատուրանի
ոստիկանատան վրայ, որուն շնորհիւ՝ զինեալներուն առջեւ փակուած է դէպի Քեսապ տանող ծովային
միակ ճանապարհը: Ապրիլ 28ին, բանակը վերահսկողութիւն հաստատած է Լաթաքիոյ հիւսիսը գտնուող
թիւ 724 բարձունքին վրայ: