Falenderimi i Papës Françesku për “Papal Foundation”
Papa Françesku falenderoi sot delegacionin e “Papal Foundation”, një organizëm katolik
që, prej mëse 25 vjetësh, mbështet projektet bamirëse në emrin e Atit të Shenjtë.
Sot, rreth 200 anëtarët e delegacionit u pritën në audiencë nga Papa, i cili përmendi
donacionet për vendet në zhvillim, projektet edukative, bamirëse e apostolike, si
edhe bursat për laikë, meshtarë e rregulltarë, që vijnë në Romë për të studiuar: “Në
këtë mënyrë, ju kontribuoni dhe siguroni formimin e një brezi të ri udhëheqësish të
bashkësive, të cilët farkëtohen në mendje e në zemër, me të vërtetat e Ungjillit,
me dijen e doktrinës shoqërore katolike e me ndjenjën e thellë të bashkimit me Kishën
universale, në shërbimin e saj për krejt familjen njerëzore”. Këto ditë me
rëndësi të madhe, tha Papa Françesku, që nga shenjtërimi i dy Papëve të jashtëzakonshëm
të kohës sonë, si Gjoni XXIII dhe Gjon Pali II, lutem që të përforcoheni në hirin
hyjnor të Pagëzimit e në impenjimin për të qenë dishepuj misionarë, plot me gëzimin,
që rrjedh nga takimi personal me Jezusin e Ringjallur.