Kardinali Komastri: Karol Vojtila, Shenjt guximtar, që jetoi duke iu bindur Ungjillit
“Shenjtorët nuk kërkojnë t’i duartrokasim, por t’i imitojmë”. Këto fjalë të Gjon Palit
II jehuan përsëri sot paradite, në Sheshin e Shën Pjetrit, gjatë homelisë së kardinalit
Anxhelo Komastri, në Meshën e falënderimit të Zotit për Shenjtërimin e Karol Vojtilës.
Në kremtim morën pjesë dhjetra mijëra besimtarë polakë, kryesuar nga kardinali Stanislau
Xhivish. Kryeipeshkvi i Krakovit u shprehu mirënjohjen të gjithë atyre, që krijuan
mundësinë për kremtimin prekës, të paharrueshëm, të Kanonizimit të dy Papëve.
Gjithçka
është e vërtetë! Të nesërmen e ditës së paparë ndonjë herë, siç do të mbetet në kujtesën
e dhjetra mijëra njerëzve nga mbarë bota e diela, 27 prill, shtegtarët u kthyen përsëri
në Sheshin e Shën Pjetrit, si të donin ta preknin përsëri me dorë, ngjarjen, që ndodhi
vetëm 24 orë më parë. Dy Papët, nga sixhadetë në fasadë, vijojnë ta shikojnë, me
buzë në gaz, Popullin e Zotit. E t’i flasin, në një dialog shpirtarsh. E sot edhe
qielli ishte më i kthjelltë. Era i dëbonte retë, duke kaltëruar hapësirën mbi Shesh
e duke i hapur diellit rrugën për të lëshuar rrezet mbi portretet e dy Shenjtorëve.
E
pamundur, të lexoje zemrën e njerëzve, mbledhur edhe sot në Shesh, ndonëse nga shprehja,
mund ta kuptoje menjëherë se aty kishte mirënjohje, shpresë, dritë. Këto, ndjesitë
që e bashkonin gjithë turmën, zhytur në lutje e në meditim. E mirënjohja ishte edhe
zemra e Meshës, kryesuar nga kardinali Anxhelo Komastri, në praninë e më se 80 mijë
besimtarëve, shumica polakë. Shtegtarët e ardhur nga vendlindja e Karol Vojtilës,
para se të merrnin udhën e kthimit, deshën ta falënderonin edhe një herë bariun, që
u priu për 26 vjet me radhë nga Roma e, më parë akoma, nga Krakovi. Pikërisht kryeipeshkvi
i dioqezës së Krakovit, “një jetë të tërë, sekretar i Gjon Palit II”, deshi t’i falënderojë
të gjithë ata, që punuan me përkushtim për Shenjtërimin e dy Papëve, duke nisur nga
Françesku e Benedikti XVI. E ndërmjet duartrokitjeve të turmës, vuri theksin tek dashuria
e Karol Vojtilës për Italinë, atdheun e tij të dytë: “Në emër të bashkatdhetarëve
të mi, e falënderoj sot Italinë dhe gjithë banorët e saj për pritjen aq të përzemërt,
që i bënë, vite më parë, Karol Vojtilës, si ipeshkëv e si Papë, i ardhur në Romë nga
‘një vend i largët’. Italia u bë, për të, atdhe i dytë. Sot sigurisht Gjon Pali II
e bekon nga lart, ashtu si e bekonte dhe Poloninë e botën mbarë. Në zemrën e tij
gjetën vend të gjitha kombet, kulturat, gjuhët”. Gjatë kremtimit, shoqëruar
nga kori i Krakovit, kardinali Komastri, mëkëmbës i Papës për Qytetin e Vatikanit,
nënvizoi dëshminë e jashtëzakonshme të Shën Gjon Palit II, “shkëmb i fesë”, mbrojtës
i guximshëm i familjes, “projekt i Hyjit’ dhe i jetës njerëzore, kundër kulturës së
përjashtimit e të egoizmit. Papë, që u bë zë i të përjashtuarve nga radhët e shoqërisë;
që i tregoi botës, me jetën e vet, bukurinë e udhës meshtarake; që e lëshoi plotësisht
vetveten në duart e Marisë, në rrugën e fesë. Papa, që diti t’i flasë zemrës së të
rinjve si “baba i vërtetë” e “edukator i sinqertë”. Kardinali Anxhelo Komastri
rikujtoi edhe 8 prillin e vitit 2005, ditën e salikimeve të Karol Vojtilës, kur flladi
dialogoi me faqet e Ungjillit, mbi arkivolin e Papës së Shenjtë: “Të gjithë,
atë çast, e pyesnin veten: ‘Kush ishte Gjon Pali II? Pse e deshëm kaq shumë?’. Dora
e padukshme, që shfletonte Ungjillin, dukej sikur thoshte: ‘Përgjigjen e keni në Ungjill!’.
Jeta e Gjon Palit II ishte bindje e vazhdueshme ndaj Ungjillit të Jezusit: prandaj
– thoshte era – prandaj e deshët kaq shumë. Njohët, në jetën e tij, Ungjillin e përhershëm;
Ungjillin, që u dha dritë e shpresë të krishterëve brezni pas breznie”. Sot,
shtoi, e dimë se kjo parandjenjë do të bëhej ngjarje, e frymëzuar e frymëzuese, do
të bëhej 27 prilli 2014, kur Kisha, përmes Papës Françesku, njohu shenjtërinë e Gjon
Palit II. E pikërisht atij, Shenjtit, që s’diti ç’është frika, kardinali Komastri
i kërkoi të lutej për Kishën, të cilën e deshi aq shumë, që të mos ketë frikë, por
të shtyhet guximshëm në shtegtun e besnikërisë heroike ndaj Jezusit.