Беларускія вернікі на плошчы св. Пятра: на Беларусі Бог жыве!
27 красавіка 2014
г. у кананізацыйнай св. Імшы на ватыканскай плошчы прыняла ўдзел вялікая група пілігрымаў
з Беларусі. Яны прыбылі з розных дыяцэзій краіны, каб раздзяліць радасць абвяшчэння
святымі двух вялікіх пантыфікаў – Яна ХХІІІ і Яна Паўла ІІ. Падчас Эўхарыстыі многія
з беларускіх пілігрымаў стаялі зусім недалёка ад алтара з заўважным транспарантам,
на якім было напісана “На Беларусі Бог жыве!”. Адной з іх была Вольга Адамовіч, маладая
верніца з мінскай парафіі Маці Божай Ружанцовай. У інтэрв’ю Ватыканскаму радыё яна
расказала, што ноч перад кананізацыяй правяла каля ватыканскай базылікі, але нягледзячы
на пэўны дыскамфорт душу сагравала малітва і спевы прадстаўнікоў розных краін, якія
чувалі разам.
Асаблівай радасцю ад кананізацыі Яна Паўла ІІ былі напоўнены
вернікі нарачанскай парафіі св. Андрэя, дзе ўстаноўлены помнік новаму святому, а таксама
захоўваюцца яго рэліквіі. Паводле Ірыны Жалубоўскай з Нарачы, пасля прызнання святасці
Яна Паўла ІІ яшчэ больш хочацца жыць паводле яго прыкладу і навучання.
Пасля
кананізацыйнай св. Імшы беларускія вернікі, святары і іерархі Каталіцкага Касцёла
ў Беларусі сабраліся разам на літургію падзякі за двух новых святых. Яна адбылася
ў ватыканскім парафіяльным касцёле св. Ганны. Ініцыятараў правядзення літургіі выступіў
Мітрапаліт Мінска-Магілёўскі арцыбіскуп Тадэвуш Кандрусевіч. Іерарх заклікаў вернікаў
весці энтузіязм атрыманы падчас кананізацыі ў Беларусь і дзяліцца ім з жыхарамі краіны.
27 красавіка 2014 г. вечарам пілігрымы плануюць вяртацца на Радзіму, таму
трэба чакаць вялікую колькасць узбагачаных цудоўным досведам блізкасці са святымі
Папамі вернікаў.