Papa në lutjen e Mbretëreshës Qiellore: Festë feje, ditë e paharrueshme
Në përfundim të Meshës për shenjtërimin e Gjonit XXIII dhe Gjon Palit II, Papa Françesku
kryesoi lutjen e Mbretëreshës Qiellore, uratë mariane e Kohës së Pashkëve. Ishte
festë feje: kështu e quajti Papa këtë ditë historike. Fjalët e tij të para, ishin
falënderim drejtuar gjithë të pranishmëve, duke nisur nga kardinajtë e shumënumërt,
tek ipeshvijtë e meshtarët, ardhur nga të katër anët e botës, për të nënvizuar, pastaj: “U shpreh mirënjohjen
Delegacioneve zyrtare të shumë vendeve, ardhur për t’u shprehur nderimet e Kombeve
të tyre dy Papëve, që dhanë një kontribut të padiskutueshëm për kauzën e zhvillimit
të popujve e të paqes”. Në mënyrë të posaçme, Papa Françesku falënderoi
autoritetet italiane, për bashkëpunimin e çmuar. Pastaj iu drejtua shtegtarëve
nga vendlindjet e të dy Papëve, nga Bergamo e Krakovi: “Të shumëdashur, nderojeni
kujtimin e dy shenjtorëve Papë, duke ndjekur besnikërisht mësimet e tyre”. E,
pas vijimit të falënderimeve drejtuar të gjithë atyre, që morën pjesë në organizimin
e kësaj feste universale, nga Dioqeza e Romës, te Komuna, Forcat e rendit dhe Organizatat
e ndryshme, Papa u drejtoi fjalën shtegtarëve: “Përshndetja ime u drejtohet
shtegtarëve, këtu, në Sheshin e Shën Pjetrit, në rrugët rreth e qark e në vende të
tjera të Romës, e edhe atyre, që u bashkuan me ne përmes radios e televizionit; falënderoj
drejtuesit dhe punonjësit e mediave, që u krijuan njerëzve mundësinë të marrin pjesë”. Përshëndetja
e fundit, të sëmurëve e pleqve, me urimin, që Shenjtorët e rinj të jenë gjithnjë pranë
tyre.Papa Françesku e përfundoi lutjen drejtuar Mbretëreshës Qiellore, që Shën Gjoni
XXIII e Shën Gjon Pali II e deshën si bij të vërtetë të Saj.