Me litanitë e shenjtorëve dhe procesionin e kremtuesve nisi, në Sheshin e Shën Pjetrit,
të Dielën e Mëshirës Hyjnore, Mesha e udhëhequr nga Papa Françesku për kanonizimin
e dy Papëve. Bashkëmeshon edhe Papa i nderit Benedikti XVI, të cilin populli i Hyjit,
i mbledhur para Bazilikës së Kreut të Apostujve e priti me duartrokitje të fuqishme,
shtuar edhe më shumë, kur Papa Françesku shkoi dhe e përqafoi.
Prefekti i
Kongregatës për Çështjet e Shenjtorëve, Kardinali Anxhelo Amato, i shoqëruar nga postulatorët,
i kërkoi Papës që të vijohej për kanonizimin e Gjonit XXIII dhe të Gjon Palit II.
Papa Françesku u përgjigj menjëherë, duke kumtuar zyrtartisht shenjtërinë e dy Papëve:
“Për nder të Trinisë së Shenjtë, për madhnimin e fesë katolike dhe për
zhvillimin e jetës së krishterë, me autoritetin e Zotit tonë Jezu Krishtit, të Shenjtërve
Apostuj Pjetër e Pal, si edhe Tonën, pasi jam menduar gjatë, pasi kam thirrur shumë
herë ndihmën hyjnore dhe pasi kam dëgjuar mendimin e shumë Vëllezërve Tanë në Episkopat,
deklarojmë dhe përkufizojmë Shenjtër të Lumët Gjoni XXIII dhe Gjon Pali II, i shkruajmë
në Albumin e Shenjtërve dhe caktojmë që të nderohen me devocion ndër shenjtorë, në
të gjithë Kishën. Në emër të Atit e të Birit e të Shpirtit të Shenjtë”.
Pastaj
reliket e dy shenjtorëve u vendosën pranë altarit.