Papa: ndokush e sulmon martesën, por familja e qëndrueshme u jep shpresë të rinjve
“Mungesa e Krishtit është varfëria më e madhe”, që pasqyrohet në të këqiat e shoqërisë,
që nga kriza e familjes, tek korrupsioni e zvetënimi moral. Duhet gjallëruar dhurata
e çmuar e fesë, duke e shpallur me guxim e gëzim Ungjillin e duke u pajtuar me Zotin.
Kështu shkruan Papa Françesku në fjalën për prelatët e Afrikës së Jugut, të Botsvanës
e të Svacilandit, që i priti sot në vizitë “ad Limina”. Në tekstin, që ua dha dorazi,
Ati i Shenjtë kujton shenjtorët afrikanë, shërbimin e Kishës për shtresat më nevojtare
të shoqërisë, sidomos për jetimët e shumtë e për të sëmurët nga Sida. Por, vë në dukje
edhe se familjet katolike kanë gjithnjë e më pak fëmijë e kjo ndikon edhe në numrin
e thirrjeve për meshtari. Disa prej katolikëve u afrohen grupeve të tjera, që duket
se u premtojnë më tepër. Aborti është bërë problem edhe në Afrikë, ku rritet numri
i ndarjeve dhe i divorceve, me pasoja të rënda për fëmijët. Fatkeqësisht, shtohet
edhe dhuna kundër grave e të vegjëlve. Kësaj analize të pamëshirshme, Papa Françesku
i bashkangjit udhët e veprimit për të dalë nga kjo gjendje. Kemi nevojë, nënvizon,
të gjejmë mënyra të reja për t’u propozuar njerëzve Krishtin, mungesa e të cilit është
varfëria më e madhe. Vetëm kështu dëshmia e bashkëshortëve të krishterë, lutja dhe
Sakramentet mund të japin frytet e dëshiruara edhe për shoqërinë. “Martesa e krishterë
– nënvizon Ati i Shenjtë – është pakt i përhershëm dashurie ndërmjet burrit e gruas,
që ka nevojë për sakrifica të vërteta, në mënyrë që çifti të largohet nga iluzioni
i lirisë seksuale e të ketë besim tek besnikëria bashkëshortore”. Ndërsa për korrupsionin,
Papa përdor fjalë edhe më të ashpra. Është si t’i vjedhësh të varfërit, thekson në
mesazh. Kjo shkatërron krejt bashkësinë , e cila humbet besimin në sistemin vendor.
Katolikëve, detyra për të dëshmuar virtytet e ndershmërisë dhe të integritetit.