Mesazh i ipeshkvijve spanjollë për zgjedhjet e Bashkimit Evropian: “Evropë, rizbulo
rrënjët e tua!”
“Nga Santiago, o Evropë, një thirrje dashurie për ty: gjeje sërish vetveten. Bëhu
sërish vetvetja. Zbulo origjinën. Gjallëro rrënjët e tua. Rijeto ato vlera të vërteta,
që e bënë të lavdishme e të frytshme, praninë tënde në kontinente të tjera. Rindërto
unitetin tënd shpirtëror në një atmosferë respekti të plotë për fetë e tjera dhe për
lirinë e vërtetë”. Fillon me këtë thirrje të zjarrtë, që i Lumi Gjon Pali II pati
shqiptuar në vitin 1982, në Santiago de Compostela, mesazhi i ipeshkvijve spanjollë
për zgjedhjet evropiane, në program më 24 e 25 maj. “Prelatët iberikë – lexohet
në dokument – i ftojnë popujt të marrin pjesë në këto zgjedhje dhe bëjnë të vetat
reflektimet e Komisionit të Episkopateve të Bashkimit Evropian (COMECE)”. Sipas këtij
dokumenti, ipeshkvijtë i ftojnë popullsitë në dialog konstruktiv për demokracinë në
Bashkimin Evropian, duke u tërhequr vëmendjen ndaj krizës financiare, që e ka rritur
numrin e të varfërve. “Çdo qytetar – shkruajnë prelatët – çdo bashkësi e çdo shtet
anëtar i Bashkimit Evropian duhet të lerë mënjanë interesat e veçanta, në favor të
së mirës së përbashkët”. Duhet të mësojmë të jetojmë me pak, duke e ndarë pjesën tjetër
me ata, që s’kanë asgjë. Nuk duhen flijuar parimet e susidiaritetit, të solidaritetit
e traditat lokale, në emër të një uniteti, që e svetënon Evropën. Ipeshkvijtë
tërheqin vëmendjen ndaj problemeve të respektimit të dinjitetit të njeriut, të familjes,
të të drejtave të emigrantëve e të azilantëve, të respektimit të lirisë fetare, e
cila duhet të përfshijë manifestimin publik të fesë, duke mos e lënë atë thjesht në
sferën private. Së fundi, prelatët evropianë nënvizojnë nevojën e mbrojtjes së ambientit,
duke u kërkuar politikanëve të jenë më të vëmendshëm ndaj ndryshimeve të klimës dhe
rritjes së nivelit të gazeve të rrezikshëm në atmosferë. Kërkojnë gjithashtu respektimin
e ditës së dielë, si ditë pushimi javore, për të lejuar rigjallërimin e energjive
fizike e shpirtërore për çdo njeri. “Bashkimi Evropian – përfundon mesazhi – ndodhet
në udhëkryq. Është e nevojshme ta ndërtojmë mirë të ardhmen, sepse të gjithë humbasim
shumë, nëse dështon projekti evropian”.