Пантыфік у Пасхальную вігілію: чэрпаць з вытокаў сваёй веры
Вярнуцца, каб сустрэцца
з Хрыстом, заклікаў папа Францішак падчас літургіі Пасхальнай Вігіліі, якую ўзначаліў
у базыліцы св. Пятра вечарам 19 красавіка 2014 г. Падчас яе Святы Айцец удзяліў сакрамэнт
хросту дзесяці асобам, у тым ліку адной беларусцы. У сваёй гаміліі Пантыфік нагадаў,
што ў апавяданні пра ўваскрасенне Пана двойчы узгадваецца заклік да неабходнасці вяртання
ў Галілею – месца, дзе пачалася сустрэча Езуса з вучнямі. Да гэтага заклікалі анёл,
каля пустой магілы Хрыста, а таксама сам уваскрослы Збаўца. “Вярнуцца ў Галілею азначае
перачытаць усё пачынаючы ад крыжа і перамогі. Перачытаць усё – прапаведванне, цуды,
новую супольнасць, энтузіязм і невыкананне абавязкаў, аж да здрады – перачытаць усё
пачынаючы ад канца, які ёсць новым пачаткам, ад гэтага найвышэйшага акту любові”,
- заклікаў Папа.
Францішак перакананы, што ў кожнага верніка ёсць свая “Галілея”
– месца адкуль пачаўся шлях з Езусам. Таму заклік “ісці ў Галілею” азначае зноў убачыць
наш хрост, як жывую крыніцу, зачарпнуць новай энергіі з каранёў нашай веры і нашага
хрысціянскага досведу. Гэта заклік вярнуцца у тую кропку, дзе адбыўся першы дотык
Ласкі Божай. “Ад гэтай іскры я магу запаліць полымя на сёння, на кожны дзень, і несці
цяпло і святло маім братам і сёстрам. Ад гэтай іскры запальваецца пакорная радасць,
радасць, якая не прыносіць болю і разгубленасці, радасць добрая і лагодная”, - сказаў
Папа.
Францішак заклікаў кожнага паразважаць над тым, дзе знаходзіцца яго ўласная
“Галілея”, каб вярнуцца ў яе і дазволіць Богу абняць сваёй міласэрнасцю. “Гэта не
вяртанне назад ці настальгія”, - падкрэсліў Пантыфік, але "вяртанне да першай любові
для атрымання агня, якім Езус запаліў свет і для таго, каб несці яго ўсім, аж да краю
зямлі".