«Մենք կ՛ողջունենք Միացեալ Նահանգներու Ծերակոյտի արտաքին յարաբերութիւններու յանձնախումբին
կողմէ Հայոց ցեղասպանութիւնը ճանչցող թիւ 410 բանաձեւի ընդունումը», յայտարարեց Հայաստանի
արտաքին գործոց նախարար Էդուարդ Նալբանդեան: Նալբանդեան ընդգծեց, որ Հայաստան բարձր
կը գնահատէ Ծերակոյտի արտաքին յարաբերութիւններու յանձնախումբի նախագահ Ռոպերթ Մենենտեսի
եւ յանձնախումբի` բանաձեւին սատարած անդամներուն սկզբունքային դիրքորոշումը: «Հայոց
ցեղասպանութեան 99-րդ տարելիցի նախաշէմին Ծերակոյտի յանձնախումբին կողմէ թիւ 410 բանաձեւին
ընդունումը կարեւոր քայլ է պատմական ճշմարտութեան վերականգնման եւ մարդկութեան դէմ ոճիրներու
կանխարգիլման հոլովոյթին մէջ», ըստ արտաքին գործոց նախարարութեան մամլոյ եւ տեղեկատուութեան
վարչութեան ` ընդգծեց Նալբանդեան: