Папа да ўрачоў-анколагаў: клапаціцца пра цела, душу і дух хворых
Урач павінен клапаціцца
пра цела, душу і дух хворага, лічыць Святы Айцец. 12 красавіка 2014 г. папа Францішак
сустрэўся ў Ватыкане з удзельнікамі кангрэса Італьянскага таварыства анкалагічнай
хірургіі. “Прымаючы вас, я думаю пра ўсіх людзей, аб якіх вы клапоціцеся, і малюся
за іх”, - сказаў Пантыфік. Ён падкрэсліў, што навуковыя адкрыцці павялічваюць магчымасці
прафілактыкі і лячэння рознага кшталту паталогій, але, калі гаворка ідзе пра здароўе,
неабходна памятаць, што чалавек створаны на вобраз і падабенства Божае, у ім існуе
адзінства цела і духа. “Грэкі былі больш дакладнымі: цела, душы і духа”, - нагадаў
Святы Айцец. Паводле яго, гэтыя элементы неабходна адрозніваць, але нельга раздзяляць.
“Такім чынам, таксама і хвароба, досвед болю і пакутаў, не тычацца толькі цялеснага
вымярэння, але ўсяго чалавека. Адсюль узнікае патрэба ў інтэгральным клопаце, які
разглядае асобу ў яе поўні і яднае з медыцынскай апекай – я б сказаў, апекай “тэхнічнай”
– таксама чалавечую, псіхалагічную і сацыяльную падтрымку, таму што ўрач павінен клапаціцца
аб усім гэтым: чалавечым целе, псіхічным, сацыяльным і духоўным вымярэнні, аб духоўным
суправаджэнні і падтрымцы блізкіх хворага”, - сказаў Папа.
Паводле Святога
Айца, братэрскае дзяленне з хворымі адкрывае на сапраўдную прыгажосць чалавечага жыцця,
нават улічваючы яго слабасць. Яно дапамагае распазнаць годнасць і каштоўнасць кожнага
чалавека ў любым стане і на любым этапе яго жыцця, ад зачацця да смерці.
Пантыфік
нагадаў, што толькі Хрыстус надае сэнс “скандалу бязвінных пакутаў”. “Шмат разоў прыходзіць
у сэрца гэта трывожнае пытанне Дастаеўскага: чаму пакутуюць дзеці? Толькі Хрыстус
можа надаць сэнс гэтаму “скандалу”. На Яго, укрыжаванага і ўваскрослага, таксама і
вы можаце заўсёды глядзець, выконваючы вашу штодзённую працу”, - пажадаў папа Францішак
італьянскім хірургам-анколагам.