Վենեզուելլայի կառավարութիւնը հրաւէր ուղղած էր Ս. Աթոռին մասնակցելու երկրի հաշտութեան
ու խաղաղութեան կլոր սեղանին։ Նորին Սրբութիւնը հեռագիր մը ուղղած է ազգային հաշտութեան
ժողովի մասնակցողներուն, որուն ընթերցումը կատարեց Վենեզուելլայի մօտ հաւատարմագրուած
առաքելական դեսպան` գերապայծառ Ալտօ Ճորտանոն։ Սրբազան Հայրը իր մտահոգութիւնը կը
յայտնէ երկրի մէջ տեղի ունեցող խռովարարութեան ու իր հայրական հոգատարութիւնը կը յայտնէ
բոլոր Վենեզուելացի քաղաքացիներուն, յատկապէս` բռնութիւններու զոհերուն։ Խորապէս համոզուած
եմ, կը գրէ Քահանայապետը հեռագիրին մէջ, որ բռնութիւնները բնաւ չեն կրնար խաղաղութիւն
ու բարօրրութիւն տալ երկրին ։ Մինչ երկխօսութեան միջոցաւ կարելի է հասնիլ հասկացողութեան
մը, հասարակաց բարիքին ի խնդիր։ ''Արդարեւ ամէնքդ դրդուած էք հայրենիքի սիրէն, ու կը
ձգտիք ձեր զաւակներու ապագայի բարիքին եւ հայրենիքի խաղաղութեան'' – կը գրէ Նորին Սրբութիւնը
ու ապա կը յիշեցնէ որ ''ամէն անկեղծ երկխօսութիւն կ'ենթադրէ դիմացինին ճանաչումն ու
յարգանքը եւ պատրաստակամութիւնը` ներումի ու ողորմութեան, ձերբազատուելու ոխի եւ ատելութեան
զգացումներէն։ Այս կը պահանջէ համբերութիւն եւ քաջութիւն, միակ ճամբան որ կարող է առաջնորդել
խաղաղութեան ու արդարութեան։ Սրբազան Քահանայապետը հեռագիրը կ'եզրափակէ ըսելով ''Յանուն
Վենեզուելլայի ժողովուրդին, ձեր զաւակներուն բարիքին համար, ձեզմէ կը խնդրեմ ունենալ
այդ քաջութիւնը ։