Եւրոպական խորհուրդի Խորհրդարանական վեհաժողովը երէկ Ռուսիան զրկեց ձայնի իրաւունքէն`
Խրիմի Ռուսիոյ կցման պատճառով: Բացի ատկէ, Եւրոպական խորհուրդի Խորհրդարանական վեհաժողովը
մինչեւ տարեվերջ հեռացուց Ռուսիան վեհաժողովի բոլոր ղեկավար մարմիններէն` բիւրօ, նախագահութիւն
եւ մնայուն յանձնախումբեր, ինչպէս նաեւ զայն զրկեց վեհաժողովի դէտերու առաքելութիւններուն
մասնակցելու իրաւունքէն: Եւրոպական խորհուրդի Խորհրդարանական վեհաժողովը բանաձեւին
մէջ Ռուսիոյ գործողութիւնները կոչած է «Խրիմի բռնակցում» եւ ուքրանական տարածքի «զինեալ
բռնագրաւում»: Վրաստանի պատուիրակութիւնը փորձեց առաջարկել բանաձեւի իր տարբերակը,
որ կը նախատեսէ մինչեւ տարեվերջ Ռուսիոյ բոլոր լիազօրութիւններու դադրեցում, սակայն այդ
մէկը չորդեգրուեցաւ: Խորհրդարանականները նաեւ մերժեցին բրիտանացի Ռոպըրթ Ուոլթըրի
առաջարկը, ըստ որուն պէտք է չեղեալ յայտարարուէին Եւրոպական խորհուրդի Խորհրդարանական
վեհաժողովին մէջ Ռուսիոյ պատուիրակութեան լիազօրութիւնները: Վեհաժողովին մէջ Ռուսիոյ
պատուիրակութեան ղեկավար Ալեքսէյ Փուշքով յայտարարեց, որ Ռուսիոյ պատուիրակութիւնը կը
լքէ Եւրոպական խորհուրդի Խորհրդարանական վեհաժողովի գարնանային նստաշրջանը` սահմանափակումներուն
պատճառով: «Մենք պիտի չմասնակցինք նստաշրջանի հետագայ աշխատանքներուն: Այժմ մենք կը
լքենք նստաշրջանը` ի նշան բողոքի, եւ մեզի իրաւունք կը վերապահենք վերատեսութեան ենթարկել
Եւրոպական խորհուրդի Խորհրդարանական վեհաժողովի նիստերուն Ռուսիոյ հետագայ մասնակցութեան
հարցը», ըսած է Փուշքով: