Святы Айцец заклікаў венесуэльскія ўлады і апазіцыю да гераізма прабачэння
Папа Францішак звярнуўся
да ўдзельнікаў мірных перамоваў паміж венесуэльскім урадам, прадстаўленым прэзідэнтам
краіны Нікаласам Мадурам і прадстаўнікамі апазіцыі, якія пачаліся 10 красавіка 2014
г. у Каракасе. Пасланне Святога Айца было прачытана Апостальскім нунцыем у Венесуэле
арцыбіскупам Альда Джардана, які быў запрошаны прыняць ўдзел у дыялогу ў якасці пасярэдніка.
Гаворка ідзе пра першую спробу перамоваў паміж венесуэльскімі ўладамі і апазіцыяй
пасля пачатку двухмесячнага супрацьстаяння ў выніку якога загінулі каля 40 чалавек.
“Насілле
не можа прынесці мір і дабрабыт ніводнай краіне, таму што яно нараджае заўсёды і толькі
насілле”, - напісаў Папа і дадаў, што адваротны эфект мае дыялог. Пантыфік падзякаваў
за запрашэнне да ўдзелу ў мірных перамовах, якое было скіравана Апостальскай Сталіцы
і запэўніў бакі ў сваёй малітве, каб сустрэча і працэс, які пачынаюць, “прынеслі жаданыя
плёны нацыянальнага прымірэння і супакою”. Папа выказаў сваю блізкасць да венесуэльскага
народа, асабліва да ахвяраў насілля і іх сем’яў.
Паводле Святога Айца, супольнаму
дабру краіны можна спрыяць толькі паважаючы і прызнаючы адметнасці, якія існуюць.
“Усе вы падзяляеце любоў да вашай краіны і вашага народа, як і вялікую заклапочанасць
звязаную з эканамічным крызісам, насіллем і злачыннасцю. Усе вы маеце ў сэрцы будучыню
вашых дзяцей і жаданне спакою, якое адрознівае венесуэльцаў. Для ўсіх вас з’яўляецца
супольнай вера ў Бога і жаданне бараніць чалавечую годнасць. Менавіта гэта вас аб’ядноўвае
і падштурхоўвае пачаць дыялог” у аснове якога “павінна быць сапраўдная культура сустрэчы,
якая ўсведамляе, што адзінства заўсёды вышэй за канфлікт”, - напісаў Пантыфік.
Францішак
заклікаў венесуэльскія ўлады і апазіцыю да ўзаемнай павагі, гераізма прабачэння і
міласэрнасці, якія вызваляюць ад пачуцця нянавісці і адкрываюць на па-сапраўднаму
новы шлях. Ён, паводле Святога Айца, патрабуе цярплівасці і адвагі, але з’яўляецца
“адзіным, які можа прывесці да міру і справядлівасці”.