Մխիթարեան Միաբանութիւնը սրտի մեծ ցաւով կը հաղորդէ որ, 06 ապրիլ 2014ին, կիրակի առաւօտեան,
Հայր Ռափայէլ Վրդ. Անտոնեան, յետ կարճատեւ հիւանդութեան, իր հոգին աւանդեց Երկնաւոր
Հօր ձեռքերուն մէջ: Հոգեշնորհ Վարդապետը ծնած է Հալէպ 14 Յունուար 1941-ին: Վենետիկ
կը ժամանէ 8 մարտ 1953-ին ու կը յաճախէ Սուրբ Ղազարի հոգեւոր ճեմարանը: 1962-ին՝ Տիրամօր
Վերափոխման տօնին օրը Ուխտադրութեամբ կ՚անդամակցի Միաբանութեան: Յետ Հռոմի «Գրիգորեան»
Համալսարանէն իմաստասիրական ու աստուածաբանական ուսումները ոսկի մետալով աւարտելուն,
Քահանայ կը ձեռնադրուի 1965ին: Պաշտօնավարած է Մուրատ-Ռափայէլեան վարժարանին մէջ որպէս
վարժապետ, հսկող, ուսումնապետ, եւ հուսկ տնօրէն եւ վարիչ ամառնային հայագիտական դասընթացքներուն
(1968-73 եւ 1985-92): Իսկ Փարիզի Սամուէլ-Մուրատեան վարժարանին մէջ իբր մատակարար, ուսումնապետ
եւ ապա տեսուչ (1973-85). Ս. Ղազարի մենաստանին մէջ, տնտես, փոխ տեսուչ (1966-68) եւ
հուսկ Ընդհ. մատակարար Մխիթարեան միաբանութեան (2008-10): Իր վերջին առաքելութիւնը
եղաւ Հովուական նուիրումը Պոսթոնի Սուրբ Խաչ Հայ Կաթողիկէ ժողովրդապետութեան, ուր ամբողջական
կենսունակութեամբ ծառայեց 1993էն մինչեւ իր մահը: Իր կարեւորագոյն արժանիքներէն մին եղաւ
պոսթոնի Հայ կաթողիկէ Համայնքը օժտել նորակառոյց կեդրոնագմբէթ շքեղ եկեղեցիով մը իր ենթակառոյցներով
: Իր վաստակներէն մին եղաւ սատար կանգնել Հայաստանի մեծ երկրաշարժէն տուժած հայութեան,
գլխաւորապէս աշխատակցելով իտալացիներուն եւ Շարլ Ազնաւորի հետ: Այս առիթով իր մեծ վաստակը
եղաւ Մուրատ-Ռափայէլեան վարժարանի դռները բանալ հայ ժողովուրդի զաւակներուն, որոնք աղէտեալ
գօտիներէն ժամանեցին Վենետիկ: Հայր Ռափայէլ Վրդ. աշխատակցած է Միաբանութեանս Բազմավէպ
պարբերաթերթին՝ իմաստասիրական ու գրական բովանդակութեամբ յօդուածներով, ինչպէս նաեւ հեղինակ
է Քահանայապետական հովուական նամակներու հայերէն թարգմանութեան. «Փրկիչը Մարդուն» Յովհաննէս
Պօղոս Բ.ի Եւ «Աստուած Սէր է» Բենետիկտոս ԺԶ.ի: Անողոք հիւանդութիւնը հիւծեց ժպտադէմ
ու կենսունակ Վարդապետը, որ հրաժեշտ առնելով իր հաւատացեալներէն եւ զօրացած Սուրբ Եկեղեցւոյ
Խորհուրդներով, մեկնեցաւ դէպի յաւերժութիւն: Իր բնածին ու աստուածատուր ձիրքերը ի
սպաս դրաւ իր ժողովուրդին եւ սէր ու յարգանք վայելեց իր աշակերտներէն եւ հաւատացեալներէն:
Բոլոր անոնք որ մօտէն ճանչցան զինքը գնահատեցին իր մէջ խոր մարդկայնութիւնը եւ Մխիթար
Աբբահօր ու Միաբանութեան նկատմամբ տածած խանդն ու պաշտամունքը: Այս հոգիէն դրդուած փափաք
յայտնեց թաղուիլ իր եղբայրակիցներուն մօտ՝ Սուրբ Ղազար Մենաստանին գերեզմանատան մէջ: Թող
իր հոգին մաքրազարդուած Քառասնորդացի պահեցողութեամբ ու հիւանդութեան տառապանքով, արժանի
ըլլայ իր պաշտած ու քարոզած ու յաւիտենական լոյսով ողողուած Աստուծոյ երանաւէտ տեսութեան,
ուր ցմիշտ կանգ կ՝առնեն լացն ու սուգը:
Պոսթոնի Ս. Խաչ Հայ Կաթողիկէ Եկեղեցւոյ
մէջ (200 Lexington St., Belmont, MA 02478) Ցաւակցութիւնները կ'ընդունուին Չորեքշաբթի
9 եւ Հինգշաբթի 10 Ապրիլ 2014-ի երեկոյեան ժամը 5-8. իսկ ուրբաթ 11 Ապրիլ 2014-ին, երեկոյեան
ժամը 6:00-ին, Սուրբ Պատարագ պիտի մատուցուի եւ եկեղեցւոյ կարգը պիտի կատարուի:
Հանգուցեալին
փափաքին համաձայն մարմինը պիտի փոխադրուի Ս. Ղազար, ուր պիտի կատարուի թաղման արարողութիւնը: Թաղման
օրուան ու ժամին մասին տեղեակ կը պահենք հաւատացեալ հասարակութիւնը յաջորդ մեր հաղորդակցութեամբ:
Մաղթելով
որ Յիսուսի Յարութեան լոյսը հասնի բարի կամեցողութիւն ունեցող համայն մարդկութեան՝