ՄԱԿ-ի ընդհանուր քարտուղար Պան Քի Մուն մտահոգութիւն յայտնած է Քեսապի վերաբերեալ տարածուած
լուրերուն մէջ գոյութիւն ունեցող մահապատիժներու սարսափելի տեսարաններուն առնչութեամբ: «Հակառակ
անոր որ ՄԱԿ-ը չի կրնար ստուգել հաղորդուող վայրագութիւններու իսկութիւնը, սակայն մարդու
իրաւունքներուն նկատմամբ աճող բռնութիւնները անհերքելիօրէն կը շարունակուին, եւ ամբողջ
գիւղերու բնակիչներ, ինչպէս` օրինակ, Քեսապի մէջ, ստիպուած կ՛ըլլան փախչիլ», ըսուած է
ՄԱԿ-ի հաղորդագրութեան մէջ: Պան Քի Մուն կը նշէ, որ Սուրիոյ կառավարական ուժերը կը
շարունակեն ամբողջ թաղամասեր աւերել: ՄԱԿ-ի ընդհանուր քարտուղարը նաեւ մտահոգութիւն կը
յայտնէ, որ կազմակերպութեան կողմէ ահաբեկչական նկատուած խմբաւորումները կը շարունակեն
վայրագաբար յարձակիլ քաղաքային բնակչութեան վրայ: Պան Քի Մուն մտահոգիչ նկատած է Սուրիոյ
մէջ շարունակուող տագնապին ընթացքին վայրագութիւններու վերաբերեալ հաղորդագրութիւնները
եւ կոչ ուղղած է հակամարտող կողմերուն եւ անոնց աջակիցներուն պաշտպանելու քաղաքայինները`
անկախ անոնց կրօնական, համայնքային եւ ազգային պատկանելիութենէն: «Թէ՛ Սուրիոյ կառավարութիւնը,
թէ՛ զինեալ խմբաւորումները իրաւական եւ բարոյական պատասխանատուութիւն ունին այդ ընելու:
Անոնք պէտք է ընեն իրենց կարելին` խուսափելու եւ կանխարգիլելու բռնութիւնները քաղաքացիներու
նկատմամբ, ներառեալ` հրետակոծումներն ու օդային հարուածները քաղաքային տարածքներուն մէջ»,
ըսած է ան: