Papa në audiencën e përgjithshme: ta shikojmë gjithçka me sytë e Zotit
Nuk duhet të jemi të krishterë pa kripë. Jeta jonë duhet të ketë gjithnjë më shumë
shijen e Ungjillit, erëmirën e Krishtit, për t’ua komunikuar të tjerëve ëmbëlsinë
dhe dashurinë e Zotit. Është thirrja e Papës drejtuar sot besimtarëve, mbledhur në
Sheshin e Shën Pjetrit për audiencën e përgjithshme. Ati i Shenjtë nisi një cikël
të ri katekizmi kushtuar dhuratave të Shpirtit Shenjt, duke u ndaluar sot te urtia.
“Ta
shikojmë botën, t’i shikojmë situatat, rrethanat, problemet, gjithçka, me sytë e Hyjit.
Kjo është urtia. Disa herë ne i shikojmë gjërat sipas dëshirës sonë ose sipas gjendjes
së zemrës sonë, me dashuri, me mllef, me zili… Jo, ky nuk është syri i Zotit. Urti
është ajo, që bën Shpirti Shenjt në shpirtin tonë, për të mundur, kështu, t’i shohim
të gjitha gjërat me syrin e Zotit”. Shpirti Shenjt, vijoi Papa, përbën
shpirtin, limfën jetike të Kishës e të çdo të krishteri: është Dashuria e Hyjit, e
cila hyn në bashkim me ne, që Shpirti Shenjt të jetë gjithnjë në zemrën tonë e t’i
përcjellë, atij që e pranon, dhurata të ndryshme shpirtërore. Papa edhe i kujtoi:
përveç urtisë, edhe mendjemprehtësinë, këshillën, qëndresën, shkencën, mëshirën, frikën
e Zotit. Në këtë kohë Krezhmësh, kohë hiri, që jemi duke jetuar, Françesku, duke u
ndaluar pikërisht tek urtia, saktësoi se nuk është fjala thjesht për urtinë njerëzore: “Kjo
dhuratë vjen nga afërsia me Hyjin, nga lidhja e thellë që kemi me Të, lidhje e bijve
me atin. E Shpirti Shenjt, kur e kemi këtë lidhje, na jep dhuratën e urtisë”. Kur
jemi në bashkim me Zotin, shtoi Papa, na duket sikur Shpirti Shenjt na e shndërron
zemrën tonë, duke na bërë ta perceptojmë gjithçka me ngrohtësinë e Tij e me dashurinë
e Tij. Atëherë Shpirti Shenjt e bën të krishterin të urtë, shpjegoi Ati i Shenjtë,
në kuptimin se “ka dijeni” për Zotin. Zemra e njeriut të urtë, në këtë kuptim, ka
ëndjen e shijen e Hyjit, saktësoi. Më pas Papa vërejti sa e rëndësishme është që
në bashkësitë tona të jenë të pranishëm të krishterë, në të cilët gjithçka flet për
Zotin: është fjala për diçka, që nuk mund ta improvizojmë, e as ta sigurojmë vetë,
sepse, dhuratë e Hyjit për ata, që i shtrohen Shpirtit Shenjt: “Nëse ne e
dëgjojmë Shpirtin Shenjt, Ai na e mëson udhën e urtisë, na e dhuron urtinë, që do
të thotë të shikosh me syrin e Zotit, të dëgjosh me veshin e Zotit, të gjykosh me
gjykimin e Zotit”. Kjo, shtoi Papa, është urtia që na e dhuron Shpirti
Shenjt, urti, që mund ta gjejmë në jetën e përditshme, në një nënë, e cila qorton
ëmbëlsisht fëmijën a në dy bashkëshortë, që janë grindur e, si kalon trazira, pajtohen
e bien në paqe: “E kjo nuk mësohet: është dhuratë e Shpirtit Shenjt. Prandaj
duhet t’i lutemi Zotit të na e japë Shpirtin Shenjt e të na japë dhuratën e urtisë,
të asaj urtie, që na mëson të shikojmë me sytë e Zotit, të ndjejmë me zemrën e Zotit,
të flasim me fjalët e Zotit. E kështu, me këtë urti, të shkojmë përpara, të ndërtojmë
familjen, të ndërtojmë Kishën e të shenjtërohemi të gjithë”.