Irak: ndërron jetë patriarku i nderit i kaldejve, Kardinali Emanueli III Delly
Vdiq në moshën 87 vjeçare Patriarku i nderit i Babilonisë së Kaldejve Kardinali Emanueli
III Delly. Në telegramin e ngushëllimeve, dërguar me këtë rast, Papa Françesku thotë
se kujton “me mirënjohje të thellë përkushtimin e ish Patriarkut ndaj popullit të
vet dhe angazhimin e tij për marrëdhënie të respektshme, të drejta dhe paqësore me
ndjekësit e feve të tjera”. Edhe, pasardhësi i Emanuelit III, Fortlumturia e tij Luiz
Rafaeli I Sako, në një komunikatë të cituar nga agjencia Fides thotë se Emanueli III
“i ka shërbyer me devotshmëri Kishës kaldease për më se 60 vjet, në fillim si meshtar,
pastaj si ipeshkëv e patriark. Jetoi kohë të vështira, që prej revolucionit të 1958-ës
deri tek luftrat e dhjetëvjeçarëve të fundit, dhe njohu përndjekjen e të krishterëve
pas ndërhyrjes së SHBA-ve. Gjatë gjithë kësaj kohe i qëndroi besnik atdheut të vet
dhe popullit, nuk e braktisi grigjën, por ndenji me besimtarët, duke u lutur, duke
i ndihmuar dhe duke u dhënë zemër. Me këto qëndrime, doli në pah shpirti i tij baritor”.
Gjatë ditëve të ardhshme do të kremtohet për të një meshë përkujtimore, në katedralen
kaldease të Shën Jozefit, në Bagdad. Mesha e përcjelljes do të kremtohet nesër në
San Diego të Kalifornisë, ku gjendej i shtruar në spital, ndërsa trupi do t’i prehet
në afërsi të Detroitit, ku banon pjesa më e madhe e familjarëve të kardinalit të ndjerë.
Në vitin 2002 Emanueli III pati dhënë dorëheqjen nga shërbesa si ipeshkëv ndihmës,
për shkak të moshës, por një vit më vonë, më 3 dhjetor 2003, ipeshkvijtë kaldeas e
zgjodhën Patriark të Babilonisë, ndërsa Iraku po kalonte një çast historik të tmerrshëm,
pas ndërhyrjes ushtarake në udhëhequr nga SHBA-të, për rrëzimin e Saddam Husseinit.
“Politikisht na kanë çliruar nga regjimi i vjetër, por faktikisht na kanë pushtuar.
Dhe popullit, cilitdo popull, kjo gjë nuk i pëlqen” – pati deklaruar Patriarku i sapozgjedhur,
në një intervistë në dhjetor 2003. Kishat e Bagdadit dhe të Mosulit pësuan sulme të
përgjakshme gjatë viteve të shërbesës së tij patriarkale.