36. Ata që erdhën nga prova e madhe (Zb 7,14): një martir shqiptar, shok udhe kah
Pashkët, sot, atë Mati Prendushi
Atë Mati Prendushi(Shkodër, 02. 10. 1881 - Shkodër, 11. 03.1948)
frati, që mori pjesë në ngritjen e flamurit në Deçiq, u përndoq dhe u fal nga krajl
Nikolla e nga mbreti Zog, por u dënua me vdekje nga i ashtuquajturi "gjyq" komunist.
Nuk i dihet as varri.
Gjykata para gjyqit të historisë (Sipas
atë Zef Pllumit)
Atë Mati Prendushi u dënua tri herë me vdekje. Mbasi mori
pjesë në ngritjen e Flamurit të parë të pavarësisë së Shqipërisë, në Deçiç, përkrah
Dedë Gjo’Lulit, më 1911, serbët e kapën dhe e dënuan me vdekje. Krajl Nikolla e fali,
me ndërhyrjen e atë Gjergj Fishtës. Të dytën herë e dënoi mbreti Zog, si pjesëmarrës
në rebelimin e Dukagjinit. U fal përsëri, mbas ndërhyrjes së atë Pal Dodës. Të
tretën herë... Tregon atë Zef Pllumi:
“Me 13 janar 1948 u ba e njohun akt-akuza
për dhetë persona, ndërmjet të cilëve, At Mati Prendushi, e edhe unë, që po i shkruej
këta rreshta. 14 pika akt-akuze, për 10 vetë, prej të cilëve tre do të dënoheshin
me vdekje. Të gjithë akuzoheshin se: “Janë klerikë të Kishës Katolike, qendër
e obskurantizmit botnor gjatë gjithë historisë Se i kanë sherbye skllavopronarëve
e të gjithë monarkëve, gjatë shekujve. Se kanë shkaktue shumë luftra fetare, Kryqëzatat
anti-islamike e se kanë pregatitë Natën e Shën Bartolomeut në Francë Se kanë pengue
shkencën e persekutue shkenctarët, tue djegë për së gjalli Galileo Galilein e Xhordano
Brunon Se kanë bashkëpunue aktivisht me të gjitha perandoritë për shtypjen e popujve Se
kanë bashkëpunue me Perandorinë Turke në dam të popullit shqiptar Se kanë bashkëpunue
me Perandorinë Austro-Hungareze dhe kanë pregatitë ardhjen e sajë Se kanë pregatitë
ardhjen e fashizmit Se kanë bashkëpunue me mbretin Zog për shtypjen e popullit
shqiptar Se kanë pregatitë okupacjonin italjan me 7 prill 1939 dhe atë të fashizmit
gjerman Se kanë luftue lëvizjen N. Ç. Se kanë dashtë me përmbysë pushtetin popullor
etj etj”. E lexova shpesh ketë akt-akuzë, mbasi më kishte marrë malli me pa germat
e alfabetit o diçka të shkrueme. E pata xanë krejt permendësh... Kjo akt-akuzë më
çuditi mjaft dhe i thoshem vedit se duhet të ishte pregatitë nga ndonji prej agjitatorëve,
që do të jepte provimet e historisë me shkrim.... E mandej ndigjova edhe akuza
ma pak historike e ma të tmerrshme, dalë prej gojës së një meshtari, akt-akuza të
një njeriu të Kishës, për Kishën. Para gjykatës komuniste!? Deri në atë ças un
njifshem nji histori Kishe vetëm me shenjtën, martirë, dijetarë, ndoshta edhe ndonjë
mkatnuer të ligshtë e të penduem, po kurr kaq hipokritë të pamshirshëm, sa po kallxonte
meshtari për meshtarët. U çatrafilue mendja ime.... Po mandej, kur nisën me folë
të akuzuemit e tjerë, e ndigjova me veshët e mi se të gjitha ishin kenë shpifje...
Atëherë m’u zhduk çdo re dyshimi për ndershmeninë e Klerit Katolik dhe e ndjejshem
veten krenar... Mbas tri ditësh në odën e Redaksisë së Hyllit të Dritës nisi gjyqi.
Nuk ishte lojë...”.
Këtë herë Atë Mati Prendushi nuk do të falej. Do të pushkatohej
‘për të larë fajet e gjithë historisë së njerëzimit’. Nga një gjykatë e rregullt,
që sot duhet të ishte gjykuar të paktën para gjyqit të historisë. Gjithsesi, katolikët
besojnë në një gjyq tjetër... Sipas At Zef Pllumit në “Rrno vetëm për me tregue”,
pj. I, Tiranë, 1995, fq176-180