Святы Пасад і міжнародная супольнасць адрэагавалі на забойства святара ў Сірыі
“Чалавекам міру” назваў
забітага ў Сірыі святара прадстаўнік Апостальскай Сталіцы кс. Фэдэрыка Ламбардзі.
Айцец Франс ван дэр Люгт, які належаў да Ордэну езуітаў, быў вядомай асобай у Хомсе,
блакаваным горадзе, які паўстанцы утрымліваюць ужо амаль два гады. Як кажуць сведкі,
7 красавіка 2014 г. у кляштар езуітаў у Хомсе зайшоў чалавек, вывеў яго на вуліцу
і двойчы стрэліў яму ў галаву, прама перад домам. “Памёр чалавек міра, які паказаў
велізарную смеласць застаючыся верным сірыйцам, нягледзячы на небяспечную і нялёгкую
сітуацыю”, - заявіў кіраўнік Залы Друку Святога Пасаду. Ён дадаў: “Там, дзе гінуць
людзі, з імі гінуць і іх верныя патыры”.
Кангрэгацыя па справах Усходніх Касцёлаў
заклікала лідэраў супрацьлеглых бакоў і міжнародную супольнасць прыкласці ўсе намаганні
для спынення канфлікту, вынікам якога стаў велізарны лік нявінных ахвяр і пастаянны
паток бежанцаў.
Айцец ван дэр Люгт застаўся ў Хомсе нават тады, калі ў гэтым
годзе 1400 чалавек былі эвакуяваныя з горада пад наглядам ААН. Генеральны сакратар
Арганізацыі Аб’яднаных Нацый асудзіў забойства галандскага езуіта, які працаваў у
Сірыі амаль 50 гадоў. Пан Гі Мун заявіў, што святар “гераічна стаяў побач з сірыйскім
народам”.
Некаторыя ісламісты, якія ўдзельнічаюць у канфлікце на баку антыўрадавых
сіл, намагаюцца прымусіць хрысціян пакінуць месцы іх традыцыйнага пражывання. Перад
канфліктам, які пачаўся 3 гады таму, у Сірыі было 2,5 млн. паслядоўнікаў Хрыста.