Papa do ta kremtojë me të sëmurët, meshën e së Enjtes së Madhe
Do të jetë një nga vendet kryesore të solidaritetit të Romës, Qendra e Zojës së Provanisë
Hyjnore e Fondacionit “Don Karlo Njoki”, ku Papa Françesku do të kremtojë meshën e
Darkës së Mbrame, të Enjten e Madhe para Pashkëve, në orën 17.00. Nota e Sallës së
Shtypit të Vatikanit njofton se në të do të marrin pjesë të sëmurët e shtruar në këtë
Qendër, së bashku me familjarët, personelin dhe përgjegjësit. Kujtojmë se vitin e
kaluar, Ati i Shenjtë u pati larë këmbët të burgosurve në Burgun e të miturve, i cili
gjendet gjithnjë në zonën, ku ngrihet qendra. Kjo strukturë i ka kaluar Fondacionit
“Don Karlo Njoki” në vitin 2003, ndërsa më parë e mbanin murgeshat e Kotolengos (Vepra
e Shtëpisë së Vogël të Provanisë Hyjnore). Qendra ka 150 shtretër për të sëmurët,
që kanë nevojë për rehabilitim e asistencë të specializuar mjekësore, me sëmundje
si Alzhajmeri, apo iktusi. Shërbimi plotësohet me rehabilitimin ditor në qendër dhe
me fizioterapinë në shtëpitë e të sëmurëve. Po këtu, ndodhet edhe Qendra e Formimit,
Orientimit dhe Zhvillimit, e cila merret me formimin profesional të personave me aftësi
të kufizuara dhe të atyre, që dëshirojnë të punojnë në këtë fushë. Organizohen shpesh
laboratore për veprimtari të ndryshme shkencore, me përdorimin e tekonologjive të
fundit.