Ati i Shenjtë në famullinë romake të Shën Gregorit të Madh: vetëm Jezusi mund të
na bëjë të dalim nga varret e zemrave tona
Vetëm Jezusi mund të na ndihmojë të dalim nga varret e mëkatit, nga zonat e vdekjes,
që i kemi në zemrat tona. Këtë nënvizoi Papa Françesku gjatë Meshës Shenjte, kryesuar
mbrëmë në famullinë romake të Shën Gregorit në Maliana. Duke kujtuar Ungjillin e djeshëm
kushtuar ringjalljes së Lazrit, Ati i Shenjtë i nxiti besimtarët të dalin nga varret,
që i ka secili nesh brenda vetes. Para kremtimit, u takua me realitetet e ndryshme
të famullisë.
Të gjithë
i kemi disa pjesë të vdekura në zemër. Disa kanë shumë, e kjo është nekrozë e vërtetë
shpirtërore. Vetëm Jezusi, pohoi Papa, mund të na ndihmojë të dalim nga këto zona
të vdekura, nga këto varre të mëkatit: “Të gjithë jemi mëkatarë. Por nëse
lidhemi ngushtë me këto varre të mëkatit, atëhere edhe i ruajmë brenda nesh e nuk
duam që e gjithë zemra jonë të ridalë në jetë: kalbemi për së gjalli e shpirti ynë
nis të bjerë erë të keqe, erën njeriut që lidhet fort me mëkatin”. Duhet
të kemi forcën për të dëgjuar atë, që i thotë Jezusi Lazrit: “Lazër, dil
jashtë! Ju ftoj, prandaj, të mendoni një çast në heshtje: ku është nekroza ime shpirtërore?
Ku është pjesa e vdekur e shpirtit tim? Ku është varri im?…E ta flakni gurin, gurin
e turpit…Ta dëgjojmë zërin e Jezusit, që me pushtetin e Hyjit na thotë: dil jashtë
nga ky varr, që ke në shpirt!”. Papa solli edhe në famullinë romake, dhuratën
e Ungjillit format xhepi: “Është dhuratë, që jua solla për ta marrë Fjalën
e Zotit e edhe për ta dëgjuar Jezusin, që thotë: dilni jashtë! E të përgatiteni, kështu
për natën e Pashkëve”. Para Meshës, Papa u takua me realitetet e ndryshme
të famullisë. Fëmijëve e të rinjve u kujtoi se nuk mund të jetohet pa shpresën e vërtetë: “Shpresa
nuk të zhgënjen kurrë, sepse është dhuratë e Zotit e ne duhet t’ia hapim zemrën Hyjit,
që të na e japë shpresën”. Të sëmurëve e pleqve u shpjegoi se shpresa është
e gjallë edhe në vuajtje: “U ringjallëm me Jezusin në kryq. E kur vjen kryqi
i sëmundjes, ne i përngjasim Jezusit”. Bashkëshortët, që i kanë pagëzuar
kohët e fundit fëmijët, i porositi: “Ka shumë rëndësi të mbajnë lidhje me
famullinë pas pagëzimit, sepse rriten të shkrirë me bashkësinë famullitare. Kështu
edhe bashkësia rritet e ndihmohet”. Duke u takuar me vullnetarët e kooperativës
“Prora”, për rikthimin në punë të ish të burgosurve dhe të ish të droguarve, Ati i
Shenjtë u tregoi vendin më të mirë, ku mund ta takojnë Krishtin:“Vendi
më i mirë për ta gjetur Zotin, është ligështia jonë. Jezusin e gjejmë më shpejt në
fajet tona, në mëkatet tona, në gabimet tona”.