Ватыканская дыкастэрыя патрабуе абароны правоў цыган
Касцёл павінен не
толькі спрыяць знаёмству цыган з Евангеллем, але таксама іх інтэграцыі ў жыццё грамадства.
Пра гэта гаворыцца ў спецыяльным пасланні Папскай рады пастырства мігрантаў і падарожнікаў,
скіраваным да членаў Міжнароднага каталіцкага камітэта па праблемах цыган, пасяджэнне
якога праходзіць зараз у Венецыі. У дакуменце адзначаецца, што цыгане “маюць патрэбу
у чалавечнасці грамадстваў, у якіх жывуць, каб адчуваць сябе членамі чалавечай сям’і”,
таму павінны карыстацца аднолькавымі правамі з іншымі членамі супольнасці. У Еўрапейскім
саюзе цыгане з’яўляюцца самай вялікай этнічнай меншасцю і таму павінны афіцыйна прызнавацца
ў якасці такой, падкрэсліваецца ў пасланні Папскай рады.
Сярод прыярытэтаў
Касцёла ў дадзенай сферы павінна быць разбурэнне муроў ізаляцыя і маргіналізацыі цыган,
якія існуюць у многіх еўрапейскіх краінах і часта з’яўляюцца наступствамі палітычных
рашэнняў. Душпастыры цыган, несучы Евангелле, павінны браць на сябе цяжар паствы і
знішчаць варожасць, якая існуе ў адносінах да яе ў грамадствах, перакананыя ў ватыканскай
дыкастэрыі. Адзначаецца, што пачынаць гэту працу неабходна з перамены сэрцаў: калі
“не будзе адкрытых сэрцаў, будзе няпроста зрабіць адкрытае грамадства”.
Касцёл
павінен натхняць супольныя намаганні ўсіх складаючых грамадства для больш годнага
жыцця цыган і іх інтэграцыі. Жыццё ў бараках і на ўзбочынах гарадскіх вуліц, уздоўж
аўтамабільных дарог і індустрыяльных зон, без вады, электрычнасці, сістэмы збору смецця,
якое вядуць цыгане, з’яўляецца “скандалам, з якім нельга пагаджацца”, гаворыцца ў
пасланні. Звяртаецца ўвага, што ў многіх краінах цыгане не маюць права на медыцынскае
абслугоўванне па прычыне адсутнасці дакументаў ці нежадання работнікаў сферы аховы
здароўя наведваць месцы іх пражывання.