Urimet e Papës, Patrikut të sapozgjedhur siro-ortodoks sirian
Të jetë “Atë shpirtëror për popullin dhe ndërtues i palodhur i paqes e i drejtësisë,
në shërbim të së mirës së përbashkët të gjithë Lindjes së Mesme, në kushtet e vështira
të sotme”. Këtë i uron Papa Françesku Patrikut siro-ortodoks të Antiokisë dhe të
mbarë Lindjes, Ignatius Aphrem II, zgjedhur më 31 marsin e kaluar nga Sinodi i Shenjtë
i Kishës së tij. Duke formuluar urimet drejtuar Patrikut, klerit dhe besimtarëve
siro-ortodoksë, Papa Françesku shton: “Ka rëndësi për gjithë të krishterët ta dëshmojnë
dashurinë dhe bashkimin, që na lidhin”, si shenjë e lutjes së Krishtit gjatë Darkës
së Mbrame: “Të gjithë të jenë një, që bota të besojë”. Falënderoj të Gjithëpushtetshmin,
përfundon Papa, për lidhjet e vëllazërisë ndërmjet Kishës Katolike e Kishës Ortodokse
siriane dhe shpresoj e lutem që miqësia jonë si dhe dialogu i vazhdueshëm të zhvillohen
e të thellohen më tej.