Kardinali Xhivish në përvjetorin e vdekjes së Gjon Palit II: Shenjt, në të gjithë
udhën e jetës
Më 2 prill 2005 vdiste i Lumi Gjon Pali II. Përfundonte, kështu, papnia e gjatë e
papës polak.Dëshmitar i jashtëzakonshëm i këtyre 27 vjetëve si dhe i periudhës së
episkopatit të tij në Poloni, është sekretari i tij, Stanislau Xhivish, kardinali
i sotëm kryeipeshkëv i Krakovit. Në këtë intervistë, dhënë gazetës vatikanase “L’Osservatore
Romano”, tri javë para së dielës së Mëshirës Hyjnore, kur Papa Françesku do ta lartojë
Gjon Palin II në nderimet e elterit së bashku me Gjonin XXIII, kardinali përshkon
disa nga çastet e jetës së Vojtilës dhe lidhjen e tij me Ditët Botërore të Rinisë,
që më 2016 do të kremtohet pikërisht në Krakov.
Pyetje: -
Si e jetoni këtë çast Ju, që ishit aq pranë Gjon Palit II për shumë e shumë vjet?
Përgjigje:
- Isha sekretar i Vojtilës për dymbëdhjetë vjet në Krakov, pastaj, gjatë gjithë
papnisë së Vojtilës. Kjo periudhë e gjatë, e kaluar përkrah tij, më ka lënë një gjurmë
të thellë. Shumë ngjarje rrodhën para syve të mi, duke nisur nga zgjedhja e një pape
jo italian, pas 455 vjetëve. Mbetet gjithnjë i gjallë ky çast. E edhe më i gjallë,
kujtimi i atentatit dramatik, në të cilin rrezikoi të humbiste jetën, më 1981, pa
folur këtu për shtegtimet e tij të panumërta baritore dhe shndërrimet e mëdha, që
ndodhën gjatë kësaj periudhe në Evropë e në botë. Të gjithë jemi të bindur se jetuam
pranë një njeriu të shenjtë.
Pyetje: - Gjurmë të pashlyeshme në ndërgjegjen
e njerëzimit la jo vetëm jeta e tij, por edhe vdekja e tij. Si i jetuat ato çaste?
Përgjigje: - Me kalimin e viteve, ai na përgatiti pak nga pak për këto
çaste të fundit, për çastin e dhimbshëm të vdekjes. Këtë çast e jetoi me qetësinë
e me sigurinë e ringjalljes. Thoshte: “E gjithë jeta ime është shtegtim drejt Zotit
e tani erdhi çasti për të kaluar në jetën tjetër”. Ishte i ndërgjegjshëm deri në fund
të fundit, ndonëse nuk dihet me saktësi kur i humbi ndjenjat. Para se të vdiste, kremtoi
Meshën e Mëshirës Hyjnore. U kungua me ndonjë pikë nga Gjaku i Krishtit, për t’u përgatitur
për jetën tjetër. Tha, më pas, uratët e natjes dhe oficen e orëve. Më pëlqen të tregoj
se në çastet e fundit tha uratën e së dielës, të ditës së nesërme, së Dielës së Mëshirës
Hyjnore. E dha shpirt pikërisht në agun e Festës. E gjithë jeta e tij, nga fillimi,
deri në sosje, u bashkua me misterin e Mëshirës Hyjnore. Kështu na dhuroi programin
për këtë mijëvjeçar: Mëshirën Hyjnore! Bota nuk do të ketë paqe, nëse nuk do të kthehet
kah kjo mëshirë.
Pyetje: - Lidhja e Gjon Palit II me të rinjtë ishte
krejt e veçantë. Ndoshta pikërisht për këtë, të rinjtë vijojnë ta duan kaq fort?
Përgjigje:
- E duan kryesisht, sepse ishte njeri i shpresës. Ai u tregonte një rrugë aspak
të lehtë, por të sigurt. E të rinjtë e perceptonin. Prandaj i ngarendnin pas. Shenjtëria
e tij dëshmon se rruga, që përshkoi, nga rinia deri në çastin e fundmë të jetës,
ishte rruga e drejtë. Edhe në ditët e fundit të shtegtimit në këtë botë, Gjon Pali
II deshi t’u drejtonte një fjalë të rinjve, të cilëve u la porosinë: “Mos kini frikë
të jeni shenjtorë, sepse shenjtorët e bëjnë historinë e i japin shtytje zhvillimit
të shoqërisë”.
Pyetje: - Si lindi ideja e ditëve botërore të rinisë?
Përgjigje:
- Lindi në vitet ’80, posaçërisht pas takimeve të mëdha të Papës me të rinjtë,
kremtuar në 1980, në Parc des Princes të Parisit e në Romë, më 1984, për Vitin Shenjt
të Shëlbimit; e edhe në vitin 1985, për vitin ndërkombëtar të rinisë. Në këto raste,
Gjon Pali II pa e kuptoi se të rinjtë ishin në kërkim të një prijësi. Ai e njihte
thellësisht shpirtin e të rinjve, sepse ka qenë gjithnjë pranë tyre, një herë si prift,
pastaj si ipeshkëv e së fundi, si papë.
Pyetje: - Ç’mesazh deshi t’u
përcillte të rinjve me këtë nismë?
Përgjigje: - Besoj se mesazhi
më i rëndësishëm është sidomos ai i dëshmisë, që i duhet dhënë botës. Përmes të rinjve,
Kisha dëshmon se është gjithnjë e gjallë, e aftë të rinohet. E rinohet edhe falë të
rinjve.
Pyetje: - Me Papën Françesku, a ndryshon ndonjë gjë në marrëdhëniet
me të rinjtë?
Përgjigje: - Çdo papë ka karizmën e vet. Bergoglio ka,
sidomos, karizmën e afërsisë me njerëzit, e besimtarët e ndjejnë thellë këtë. Në Argjentinë
ishte bari i dioqezës së madhe të Buenos Ajres, prandaj e kupton mirë varfërinë e
ligështinë e njerëzve, e kërkon edhe t’u japë përgjigje gjithë këtyre situatave. Duke
krahasuar gjestet e tij me gjestet e Papës Gjon Pali II, mund të them se janë të
ngjashme, ndonëse, natyrisht, jo të njëjta.
Pyetje: - Si e pritët lajmin
për Ditën botërore të rinisë, që do të kremtohet në Krakov?
Përgjigje: -
Krakovi e Polonia ngazëllojnë, sepse, pas Ditës Botërore të 1991-së kremtuar në Çestokova,
të dy qytetet, e vetë Polonia, do të bëhen qytet e vend i rinisë. Dita e ardhshme
botërore e rinisë do të kremtohet më 25 korrik, deri më 1 gusht 2016, në parkun e
madh të rrethinave të qytetit, me emrin Beonie. Jemi tejet të kënaqur, që Papa Françesku
e mori këtë vendim, gjë që e mbush me gëzim mbarë Poloninë. Çdo dioqezë do të impenjohet
për suksesin e kësaj ngjarjeje të madhe. Po kryesisht do të lëvizin vetë të rinjtë,
që do ta vënë gjithë entuziazmin e tyre në shërbim të kësaj ngjarjeje. DBR-së lidhen
me fije të dyfishta me Gjon Palin II. E kjo Ditë do të jetë më e lidhura. Dëshirojmë
t’ia kushtojmë kujtimit të tij, shenjtërisë së tij, vëmendjes së tij të jashtëzakonshme
për të rinjtë. Do të jetë edhe rast i përshtatshëm për ta falënderuar për gjithë atë
dashuri ndaj breznive të reja, të gjithçkaje që bëri Papa Vojtila e që na e la trashëgim.
Pyteje:
- E keni nisur punën për organizimin e takimit të madh të të rinjve?
Përgjigje:
- Krakovi ka nisur të hapë zemrën e krahët. Do të shkëlqejë nga gëzimi i arritjes
së mijëra të rinjve nga mbarë Bota. Dua ta ftoj, në emër të gjithë Kishës, që është
në Krakovë, rininë e të pesë kontinenteve. Po bëhemi gati ta presim përzemërsisht
në emër të Krishtit e i kërkojmë të kthehet në shtëpi, duke mbartur në zemër mesazhin
e Jezusit, atë që Gjon Pali II na e la trashëgim të gjithëve. Do të jetë sfidë e vërtetë
për Krakovin. Dioqeza jonë mund t’i japë botës një shembull besnikërie. Kisha polake
ka qenë gjithnjë besnike ndaj vlerave të Ungjillit, ndaj Selisë së Shenjtë. Ka qenë
gjithnjë e bashkuar me Romën: kjo është forca e saj, forca e popullit polak, që kapërceu
të gjitha vështirësitë nën regjimin nazist e pastaj edhe nën atë komunist. Kisha në
Poloni e dinte se ishte dikush, që mendonte për të në Romë, e kjo e mbushte me shpresë.