Atë Cantalamessa: Është e mundur ta kemi mik Jezusin. Ai është vërtet i pranishëm
Kush është Jezu Krishti dhe si arrimë të kemi një ide rreth tij, mbi të cilën mund
ta mbështesim fenë tonë: kjo është tema që shtjelloi sot paradite Atë Raniero Cantalamessa
në predikimin e katërt të Kreshmëve, në praninë e Papës dhe të Kurjes Romake, në kapelën
e Nënës së Shëlbuesit të Pallatit Apostolik. Predikuesi i Shtëpisë Papnore ndoqi fillin
e mësimeve të Leonit të Madh, mendimi kristologjik i të cilit është gur kilometrik
në Kishë. Jezu Krishti është
Hyji i bërë njeri; natyra hyjnore dhe ajo njerëzore rrinë bashkë tek ai pa u përzjerë
e pa u ngatërruar, duke ruajtur secila vetitë e veta; ai është Biri i Hyjit – i kryqëzuar
e i varrosur – dhe është gjithashtu Biri i njeriut, i ardhur nga qielli. Këto janë
të vërtetat themelore, që i quajmë dogma kristologjike. Tradita e Kishës i ka përpunuar
në kohë, Shën Leoni i Madh, i cili qe Papë në shekullin V, i lidhi i pari në një formulim
të vetëm, që përmbledh persiatjet teologjike të Lindjes dhe të Perëndimit. Mbi këto
siguri duhet ta themelojë fenë i krishteri, pohoi Atë Cantalamessa, dhe, me ndihmën
e Shpirtit të Shenjtë, duhet ta shikojë Jezusin si person: “Fatkeqësisht, Jezusi,
për shumë vetë është një personazh, një përmbledhje dogmash, doktrinash, gati një
institucion. Por, përkundrazi, është jetike – edhe për ungjillëzimin – që Jezusi të
jetë për ne një person i gjallë”. E, atëherë, duhet të shkojmë edhe më tej: “Është
e mundur ta zgjedhim Jezusin si mik, sepse ai është ringjallur, është i gjallë. Prania
e tij, edhe pse shpirtërore, jo fizike, është më reale, pafundësisht më reale se prania
fizike, apo e hamendësuar”. Për të arritur deri në këtë pikë, nuk duhet ndarë
në asnjë mënyrë figura e Jezusit, siç rindërtuar hulumtimet historike, nga Krishti
i dogmës. Është gabim të ndjekësh arsyen shkencore pa mbajtur parasysh fenë, prandaj
duhen lënë mënjanë të gjitha ato rindërtime historike të Jezusit, që e përjashtojnë
të vërtetën e pashkëve. Predikuesi i Shtëpisë Papnore shtoi se “hulumtimi i ungjijve...
na tregon se historia” nuk mund të na çojë tek “Jezusi në vetvete”, ndërsa dogma e
përkufizon me një formulë: ta shikosh Jezusin si person, do të thotë “të thuash se
është ringjallur, se jeton, se është para meje, se mund t’i drejtohem me “ti”, sikurse
ai më drejtohet me “ti”. Pra, historia nuk mjafton, por as formulimet teologjike
nuk janë të mjaftueshme. Janë njësoj sikur të gjendeshim përballë një formule kimike,
si ajo e ujit. Formula na thotë se uji është i përbërë nga dy molekula hidrogjeni
dhe një oksigjeni, por nuk na e jep ujin ta pimë apo të notojmë në të. Megjithatë,
formula H2O nuk është e kotë, sikurse nuk janë të kota formulimet dogmatike, por mënyra
për ta njohur Jezu Krishtin është tjetër gjë, saktësoi predikuesi i Shtëpisë Papnore: “Rrallë
herë e mendojmë Jezusin si mik, sepse në nënvetëdijen tonë mbizotëron ideja se: “Ah,
ky Jezus, pas kryqëzimit, pas ringjalljes, u ngjit në qiell dhe do të kthehet në lavdi,
në ditën e fundit”. Pra, është e vështirë, përkundër, ta ndiejmë të pranishëm, me
ne, të dëshiruar për të vendosur një marrëdhënie me ne”. Dhe Ungjilli sipas
Gjonit tregon se Jezusi vetë ka thënë: “Unë ju quajta miq, sepse ju tregova të gjitha
gjërat që kam dëgjuar nga Ati im”.