Ռուանտայի եպիսկոպոսական համահաւաք դասի կանոնական այցելութիւնը Սուրբ Պետրոսի յաջորդին։
Ռուանտայի եպիսկոպոսները իրենց հնգամեայ կանոնական այցելութեան առթիւ ժամանած են Հռոմ
ուր հինգշաբթի 3 ապրիլի առաւօտեան, հանդիպեցան Ֆրանչիսկոս Քահանայապետին։ Ռուանտայի
հանրապետութիւնը ունի 26,338 քմ քառակուսի տարածք եւ 10 միլիոն 537 հազար 222 բնակիչ
(ըստ 2012-ի տուեալներուն)։ Ռուանտայի բնակչութեան 80 տոկոսը քրիստոնեայ կրօնի կը պատկանին
ու անոնց 50 առ հարիւրը կաթողիկէ են։ Ռուանտայի կաթողիկէ եկեղեցւոյ եպիսկոպոսական
համահաւաք դասի նախագահն է` գերապայծառ Սմարակտէ Մպոնյինթեկէ։Եկեղեցին կազմուած է մէկ
Արքեպիսկոպոսական աթոռէ եւ 8 թեմերէ։ Ռուանտայի առաջին աւետարանացումը սկիզբ առաւ
1900-թուականին, Ափրիկէի Միսիոնարներու շնորհիւ։ 1922-ին հաստատուեցաւ Ռուանտայի առաջին
առաքելական առաջնորդութիւնը։ Երջանկայիշատակ Յովհաննէս Պօղոս Բ Քահանայապետը Ռուանտան
այցելեց 1990 թուականին։ Չորս տարիներ ետք 1994-ին, Ռուանտան ապրեցաւ քսաներրորդ դարու
անողորմ ու ահռելի ամենամեծ աղէտներէն մին`ցեղասպանութիւնը, որ պատճառեց աւելի քան
800 հազար զոհ, որոնց շարքին` 4 եպիսկոպոսներ, 123 քահանաներ եւ 300 կրօնաւորներ։ Յայտնենք
թէ այս տարի կը նշուի Ռուանտայի ցեղասպանութեան 20-րդ ամեակը։։ Ռուանտան երկար տարիներ
եղած է Պելկիայի խնամակալութեան տակ։ 1 յուլիս 1962-ին Ռուանտան կ՛անկախանայ իսկ 1973-ին
ռազմական հարուածի մը հետեւանքով հութու ցեղի պատկանող զօրավար Եուվենլա Հապիարիմանա`
կ՛անցնի մենատէր վարչկարգի մը գլուխը։ 1990ին սկիզբ կ՛առնէ քաղաքացիական պատերազմ
ընդմէջ Թութսի ցեղի զինուորական խմբակներու եւ Հութու ցեղի կառավարական զօրքերու։ 1994-ին
Հապիարիմանա նախագահի սպաննութենէն ետք երկրին իրավիճակը կը վատթարանայ սկիզբ տալով սարսափելի
նախճիրի մը որ 7 ապրիլէն մինչեւ 19 յուլիս կը պատճառէ աւելի քան 800 հազար զոհ եւ գաղթականութեան
կը մատնէ աւելի քան երկու միլիոն մարդ։ 27 ապրիլ 1994-ի չորեքշաբթի օրուայ հրապարակային
ունկնդրութեան ընթացքին Երջանկայիշատակ Յովհաննէս Պօղոս Բ Քահանայապետը եղաւ առաջինը
որ կոչ ուղղեց` դադրեցնելու համար Ռուանտայի արիւնահեղութիւնը։