Մինչ Մետվետեւ Խրիմ կ՛այցելէ՝ Քիեւ կը մերժէ շրջաններուն յաւելեալ իրաւասութիւն տալու
առաջարկը։
Երկուշաբթի, Մարտ 31ին, Ռուսիոյ վարչապետ Տմիթրի Մետվետեւ Խրիմ այցելեց՝ զայրացնելով
Քիեւի իշխանութիւնները: Արդարեւ, Ուքրանիոյ արտաքին գործոց նախարարութիւնը դատապարտեց
Մետվետեւի այցելութիւնը, որ իր տեսակին մէջ առաջին բարձրաստիճան այցելութիւնն է՝ Խրիմի
Ռուսիոյ միացումէն ետք: Մետվետեւ յայտարարեց, թէ Մոսկուա որոշած է տնտեսական յատուկ
գօտիի մը վերածել Խրիմը, զարկ տալու համար տնտեսութեան բարգաւաճման: Միւս կողմէ, Քիեւի
իշխանութիւնները անընդունելի նկատեցին անցեալ շաբաթավերջին կրկնուած Մոսկուայի այն առաջարկը,
թէ Ուքրանիոյ իշխանութիւնները պէտք է երկրի շրջաններուն յաւելեալ իրաւասութիւններ շնորհեն: Ռուսիոյ
արտաքին գործոց նախարար Սերկէյ Լաւրով եւ Միացեալ Նահանգներու արտաքին գործոց նախարար
Ճան Քերի Փարիզի մէջ Ուքրանիոյ մասին խորհրդակցութիւններ ունեցած էին անցած շաբաթավերջին:
Հանդիպումը արագօրէն կազմակերպուած էր եւ արդիւնք էր անցեալ Ուրբաթ օր Ռուսիոյ նախագահ
Վլատիմիր Փութինի նախաձեռնութեամբ՝ նախագահ Պարաք Օպամայի հետ տեղի ունեցած հեռաձայնային
զրոյցին: Հանդիպման ընթացքին Լաւրով առաջարկած է Ուքրանիան վերածել չէզոք եւ դաշնակցային
պետութեան մը. առաջարկ մը, զոր Քիեւ «ամբողջական անձնատուութեան» համազօր քայլ մը որակեց: Միւս
կողմէ, ՆԱԹՕի ընդհանուր քարտուղար Անտերս Ֆոկ Ռասմուսեն յայտնեց, թէ ՆԱԹՕի դէպի արեւելք
ընդարձակման հոլովոյթը պիտի շարունակուի, հակառակ Ուքրանիոյ իրադարձութեանց: Ան Խրիմի
մէջ Ռուսիոյ գործողութիւնները նկատեցէ «միջազգային իրաւունքի, ինչպէս նաեւ Ուքրանիոյ
տարածքային ամբողջականութեան խախտում»: