Toka e Shenjtë: ministri palestinez i turizmit takon Patriarkun Twal për vizitën e
Papës
Vizita e Papës Françesku në Tokën e Shenjtë, roli i tij për zhvillimin e harmonisë
mes popujve, ligjërimi i tij për paqen: këto ishin disa nga temat që u diskutuan në
takimin e ministrit palestinez të turizmit Roula Ma’aya, me Patriarkun Latin të Jeruzalemit
Fouad Twal, në Jeruzalem. Në njoftimin e faqes zyrtare të Patriarkatit të Jeruzalemit
thuhet se në takim ishte i pranishëm edhe përfaqësuesi i autoritetit palestinez pranë
Selisë së Shenjtë Issa Kassissiyeh. Synimi ishte ai i analizimit, nga njëra anë,
të programit të vizitës së Papës në Tokën e Shenjtë më 24-26 maj dhe, nga ana tjetër,
theksimi i rëndësisë që ka kjo ngjarje për popullin palestinez, jo vetëm nga pikëpamja
ekonomike, edhe pse të ardhurat kryesore të Palestinës i sjell turizmi, por mbi të
gjitha nga pikëpamja shpirtërore. Ministri Ma’ayah theksoi rëndësinë e bashkëpunimit
të ministrisë palestineze me Kishën Katolike, për t’u siguruar një mikpritje sa më
cilësore shtegtarëve që mbërrijnë nga gjithë bota. Nga ana e tij, Patriarku Twal
u shprehu mirënjohjen autoriteteve palestineze për angazhimin me të cilin po e përgatiten
për ta pritur Atin e Shenjtë, theksoi rëndësinë e bashkëpunimit ndërmjet Kishës Katolike
dhe shtetit palesitnez dhe i uroi punë të mbarë përfaqësuesit të sapoemëruar të Palestinës
pranë Selisë së Shenjtë Issa Kassissiyeh